ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐱᒍᑦᔨᕕᖏᓐᓂ ᖃᕆᑕᐅᔦᑦ ᐊᑐᕐᑕᐅᓯᐊᕋᓱᐊᕆᐊᖃᕐᓂᖏᑦ
ᖃᕆᑕᐅᔦᑦ ᐊᑐᕐᑕᐅᓯᐊᕋᓱᐊᒋᐊᖃᕐᑎᓗᒋᑦ ᐋᕐᕿᑕᐅᓯᒪᕗᑦ ᓲᓱᒋᔭᐅᑦᓯᐊᓗᑎᒃ ᒪᓕᒐᓕᐊᕆᔭᐅᓯᒪᒍᑎᖏᑦ ᖃᕆᑕᐅᕈᑏᑦ, ᐱᓗᐊᕐᑐᖅ ᖃᕆᑕᐅᔭᑎᒍᑦ ᐊᓪᓚᖃᑦᑕᐅᑎᒍᑎᑎᒍᑦ ᐊᓪᓚᖃᑦᑕᐅᑎᒍᑎᐅᕙᑦᑐᐃᑦ, ᓇᐅᓕᒫᓄᑦ ᑐᓴᕐᑕᐅᑎᑦᓯᓂᐅᕙᑦᑐᐃᑦ ᐊᒻᒪᓗ ᐅᖃᐅᓯᑦᓴᕆᔭᒥᓂᒃ ᐊᓪᓚᓂᐅᕙᑦᑐᐃᑦ ᓇᐅᓕᒫᓄᑦ ᖃᕆᑕᐅᔭᑎᒍᑦ ᑐᓴᖃᑦᑕᐅᑎᒍᓐᓇᐅᑏᑦ ᐱᑦᔪᑎᒋᑦᓱᒋᑦ.
ᑐᕌᒐᖃᕐᒪᑕ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒫᔩᑦ ᐱᒍᑦᔨᒍᑎᒋᔭᖏᑦ ᐃᓄᓕᒫᓄᑦ ᑐᓴᕐᑎᓯᒍᑎᐅᒋᐊᖃᓲᒍᒻᒪᑕ ᐊᒻᒪᓗ ᖃᕆᑕᐅᔭᒥᑦᑎᐊᖏᑦᑎᒍᑦ ᓇᐅᓕᒫᓂᒃ/ᐃᓄᓕᒫᓂᒃ ᑐᓴᕐᑎᓯᒍᑎᖃᕆᐊᖃᓲᒍᑦᓱᑎᒃ ᐱᓇᓱᐊᕐᑕᒥᑦᑕ ᒥᑦᓵᓄᑦ ᐊᒻᒪᓗ ᖃᓄᐃᓗᕐᑎᓯᓂᕆᔭᖏᑦᑕ ᒥᑦᓵᓄᑦ ᓄᓇᕕᒻᒥ ᐃᓗᓯᓕᕆᓂᕐᓄᑦ ᐃᓄᓕᕆᓂᕐᓄᓗ ᐱᒍᑦᔨᒍᑎᒋᔭᒥᓂᒃ ᐃᓘᓐᓈᒍᑦ ᑐᓴᐅᒪᑎᑦᓯᒋᐊᖃᓲᒍᒻᒪᑕ. ᐅᖃᖃᑎᒌᑦᓯᐊᓃᑦ ᐃᓱᒪᒋᔭᒥᓂᓪᓗ ᑕᐅᕐᓰᖃᑦᑕᐅᑎᑦᓯᐊᖃᑦᑕᓃᑦ ᐅᖄᔭᐅᔪᓄᑦ ᓱᓇᑐᐃᓐᓇᓄᑦ ᐃᓕᖓᔪᐃᑦ ᑐᖕᖓᓲᑎᒋᔭᐅᓗᑎᒃ ᐅᖄᔭᐅᒍᓐᓇᓯᐊᕐᑐᑦ ᐊᒻᒪᓗ ᑌᒣᖁᔭᐅᑦᓯᐊᓱᑎᒃ.
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᖃᕆᑕᐅᔭᑎᒍᑦ ᓇᐅᓕᒫᓄᑦ ᑐᓴᕐᑎᓯᕕᒋᓲᖓ ᐊᐅᓚᑕᓪᓚᕆᑉᐳᖅ ᑐᓴᐅᒪᖃᑦᑕᐅᑎᓕᕆᔨᓄᑦ.
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᒪᓕᒐᕐᓂᒃ ᐋᕐᕿᒋᐊᕆᐊᖃᕐᑐᕆᓕᕈᑎᒃ ᖃᖓᑐᐃᓐᓇᓕᒫᖅ ᐱᔪᓐᓇᐅᑎᖃᑦᓯᐊᑐᑦ ᐊᓯᑦᔩᒋᐊᕈᒪᑐᐊᕈᑎᒃ ᐊᒻᒪᓗ ᑭᓇᒃᑯᓂᓘᓐᓃᑦ ᖃᐅᔨᒪᑎᑦᓯᓗᑯᒋᐊᖃᕋᑎᒃ ᓯᕗᓂᐊᒍᑦ ᑌᒣᒍᒪᓕᑐᐊᕈᑎᒃ.
ᓱᒐᓗᓗᐊᕐᑎᓯᑦᑌᓕᓂᖅ
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᑐᓂᒪᑦᓯᐊᐳᑦ ᐃᑉᐱᒍᓱᑦᓯᐊᕋᓱᐊᕆᐊᖃᕐᓂᒥᓂᒃ ᐊᒻᒪᓗ ᓱᒐᓗᐊᓗᐊᕐᕕᐅᑌᓕᑎᑦᓯᒋᐊᖃᕐᓂᒥᓂᒃ ᖃᕆᑕᐅᔭᑎᒍᑦ Facebook-ᒦᔨᐊᒥᓂᒃ ᐱᓇᓱᓐᓇᐅᑎᓪᓗᒍ, ᐊᓪᓕᕆᕐᑐᓂᑦ ᓂᕿᑦᓯᑐᓄᑦ, 9-ᖑᒥ ᐅᓪᓛᑯᑦ 12-ᒧᑦ ᐊᒻᒪᓗ 1-ᒥᑦ 5-ᒧᑦ ᐅᓐᓄᓴᒃᑯᑦ, ᕿᑲᕐᓀᑦ ᐅᓪᓗᐃᑦ ᐃᓚᒋᔭᐅᑎᓐᓇᒋᑦ. ᐊᑑᑎᔭᐅᓗᑭᓲᒍᖕᖏᑐᐃᑦ ᐊᑑᑎᕉᑕᕆᑎᓪᓗᒋᑦ ᐱᓗᐊᕐᑐᖅ, ᖃᓂᒪᓇᕐᑐᖃᕉᑕᕆᓂᖓᓂ Covid-19 ᓇᒧᓖᒫᖅ ᐃᕐᐸᓯᒪᕉᑕᕆᓂᖓᓂ ᐃᑯᓪᓚᕋᓱᐊᖁᓇᕐᑐᐃᑦ, ᐊᔪᐃᓐᓇᕋᓱᐊᕆᐊᓪᓛᒍᑏᑦ ᐱᓇᓱᐊᕐᑎᓯᒍᑎᐅᖃᑦᑕᓕᕐᑎᓗᒋᑦ ᐱᓗᐊᕐᑐᖅ ᓱᒐᓗᓗᐊᕐᑎᓯᑦᑌᓕᒋᐊᖃᓗᐊᖕᖑᐊᓕᕐᒥᔪᒍᑦ ᖃᕆᑕᐅᔭᒥᑦᑎᐊᑎᓐᓂᒃ Facebook-ᑯᑦ ᐅᓪᓗᓕᐅᕐᑕᐅᓯᒪᕕᖏᑦᑕ ᓯᓚᑖᒍᑦ (ᐅᓪᓛᒪᕆᒃᑯᑦ, ᐅᓐᓄᓴᒃᑯᓗ ᐊᒻᒪᓗ ᐱᓇᓱᐊᕈᓯᐅᑉ ᓄᖕᖑᐊᖏᓐᓂ).
ᐅᖃᐅᓯᑦᓴᕆᔭᐅᔪᓂᒃ ᐊᓪᓚᑕᐅᔪᕕᓂᓕᒫᑦ ᐊᑐᐊᕐᑕᐅᓲᑦ/ᐊᓪᓚᓂᐊᕐᑕᐅᓲᑦ ᐊᒻᒪᓗ ᐃᓱᒪᑦᓴᓯᐅᕈᑕᐅᒋᐊᖃᓲᒍᑦᓱᑎᒃ. ᑌᒣᒐᓗᐊᕐᑎᓗᒋᑦ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐃᓘᓐᓈᓕᖏᓐᓂᒃ ᐊᓪᓚᑕᔪᕕᓂᓕᒫᓂᒃ ᑭᐅᒍᓐᓇᔭᖏᑦᑐᑦ ᐊᒻᒪᓗ ᓂᓪᓕᕈᑎᖃᕈᓐᓇᔭᒐᑎᒃ.
ᐊᓕᐊᓇᕐᑐᓂᒃ, ᐃᓄᑦᓯᐊᒍᒐᓱᐊᕐᑐᓄᓪᓗ ᐅᖃᐅᓯᑦᓴᕆᔭᐅᔪᕕᓃᑦ ᐊᒻᒪᓗ ᐊᑦᑕᓀᑦᑐᒥᑦᑎᓯᑦᓯᐊᕋᓱᐊᕐᓂᒧᑦ ᐅᖃᖃᑎᒌᒍᑎᑦᓯᐊᕕᓃᑦ, ᖃᕆᑕᐅᔭᒥᑦᑎᐊᑎᓐᓂᒃ ᐊᑑᓲᓕᒫᑦ ᓲᓱᒋᒋᐊᖃᕋᑦᑎᒋᑦ, ᐅᖃᐅᓯᑦᓴᕆᔭᐅᔪᕕᓃᑦ ᓈᒻᒪᓯᐊᖕᖏᑐᐃᑦ ᐲᕐᑕᐅᑐᐃᓐᓇᕆᐊᓖᑦ ᑐᓴᕐᑎᓯᒍᑎᐅᕐᖄᔭᒍᓐᓀᓗᑎᒃ ᓯᕗᓂᐊᒍᑦ, ᐊᓪᓚᓯᒪᔪᐃᑦ ᐃᒣᑦᑐᓂᒃ:
- ᓇᐅᑐᐃᓐᓇᒥᒃ ᓱᓇᐅᑦᓴᖏᑦᑑᕙᓪᓛᔪᐃᑦ, ᓲᓱᑦᓴᖏᕙᓪᓛᔪᐃᑦ, ᕿᓕᖕᖑᕙᓪᓛᓱᑎᒃ ᐅᒋᐊᖕᖑᕙᓪᓛᔪᐃᑦ, ᐃᓅᖃᑎᑦᓴᕆᖕᖏᑕᒥᓂᒃ ᓇᕐᕈᕙᓪᓛᔪᐃᑦ, ᑕᒫᓂᒥᐅᒍᖕᖏᑑᓂᕋᐃᕙᓪᓛᔪᐃᑦ, ᐊᖑᑕᐅᖃᑎᒌᑦᓱᑎᒃ ᐊᕐᓇᐅᖃᑎᒌᑦᓱᑎᓪᓘᓃᑦ ᐁᑉᐸᕆᓲᓂᒃ ᐊᓕᐊᖕᖏᕙᓪᓛᔪᐃᑦ, ᐅᕝᕙᓘᓐᓃᑦ ᐃᑦᓯᒍᕐᓂᓗᕝᕙᓛᔪᐃᓪᓗ;
- ᐱᔪᒪᔭᐅᑎᑦᓯᒐᓱᐊᕐᓃᑦ ᖃᓄᐃᑦᑐᑐᐃᓐᓇᓯᐊᓂᒃ ᓱᓇᑐᐃᓐᓇᓯᐊᓂᓪᓗ;
- ᖃᕆᑕᐅᔭᒥᑦᑎᐊᓄᑦ ᒥᑦᓵᓂᑦᔭᒐᑎᒃ ᐅᖃᐅᓯᑦᓴᕆᔭᐅᔪᐃᑦ;
- ᓇᐅᑐᐃᓐᓇᓄᑦ ᖃᐅᔨᔭᐅᒋᐊᖃᖕᖏᑐᓂᒃ ᓄᐃᑦᓯᖃᑦᑕᓃᑦ ᐃᒻᒥᓂᕐᓱᓱᑎᒃ ᐅᕝᕙᓘᓐᓃᑦ ᐊᓯᖏᓐᓄᑦ ᖃᐅᔨᔭᐅᑎᑦᓯᖃᑦᑕᓃᑦ ᖃᐅᔨᔭᐅᒋᐊᖃᖕᖏᑐᓂᒃ ᐅᕝᕙᓘᓐᓃᑦ ᖃᐅᔨᔭᐅᑎᑦᓯᔪᐃᑦ ᐃᓅᑉ ᑭᓇᐅᓂᖓᓂᒃ.
ᓲᓱᒋᔭᖃᕆᐊᖃᕐᓃᑦ ᓇᐅᑐᐃᓇᓄᑦ ᐃᓅᓯᖏᓐᓅᓕᖓᔪᓂᒃ ᖃᐅᔨᔭᐅᑎᖃᑦᑕᕆᐊᖃᖕᖏᓃᑦ ᐊᒻᒪᓗ ᓇᐅᑐᐃᓐᓇᓄᑦ ᓇᒻᒥᓂᖏᓐᓅᓕᖓᔪᐃᑦ ᓴᐳᒻᒥᔭᐅᒋᐊᖃᕐᓂᖏᑦ ᖃᐅᒪᔭᐅᒋᐊᖃᖕᖏᑐᐃᑦ
ᖃᕆᑕᐅᔦᑦ ᐱᑐᑦᓯᒪᐅᑎᒍᑎᖏᓐᓂᒃ ᐊᑐᕐᑐᓕᒫᑦ ᓇᒻᒥᓂᖅ ᐅᖑᒪᒐᓱᐊᕆᐊᖃᕐᐳᑦ ᐅᖃᐅᓯᕐᒥᓂᒃ ᐃᑉᐱᒍᓱᑦᓯᐊᓗᑎᒃ ᐊᒻᒪᓗ ᑕᑯᒐᓱᐊᑦᓯᐊᖃᑦᑕᓗᑎᒃ ᐅᖃᐅᓯᕆᔭᖏᑦ ᓈᒻᒪᓈᕐᓯᒪᑦᓯᐊᕋᓗᐊᕐᒪᖔᑕ. ᖃᕆᑕᐅᔭᑎᒍᑦ ᐱᑐᑦᓯᒪᐅᑎᓂᒃ ᐊᑐᖃᑦᑕᑐᐃᑦ ᐊᑐᓂ ᑲᒪᑦᓯᐊᕋᓱᐊᕐᑐᓴᐅᕗᑦ ᑐᓴᕐᑎᓯᒍᑎᒋᓚᖓᔭᒥᓂᒃ ᓇᐅᑐᐃᓐᓀᑦ ᓇᒻᒥᓂᖏᓐᓅᓕᖓᔪᓂᒃ ᖃᐅᔨᒪᔭᐅᒋᐊᖃᖕᖏᑐᓂᒃ ᑐᓴᕐᑎᓯᒍᑎᖃᓕᕋᓗᐊᕐᒪᖔᕐᒥᒃ ᐊᒻᒪᓗ ᓇᐅᑐᐃᓐᓀᑦ ᖃᐅᔨᒪᐅᒋᐊᖃᕐᑐᖁᑎᒋᖕᖏᑕᖏᓐᓂᒃ ᓲᓱᑦᓴᓯᐊᕆᐊᖃᕐᓱᑎᒃ ᓇᐅᓕᒫᓄᑦ ᑕᑯᔭᐅᑎᑦᓯᑌᓕᒐᓱᐊᖃᑦᑕᓗᑎᒃ ᖃᐅᔨᒪᔭᐅᒋᐊᖃᖕᖏᑐᓂᒃ ᐃᓅᑉ ᐃᓅᓯᖏᓐᓅᓕᖓᔪᓂᒃ ᐊᒻᒪᓗ ᑭᓇᐅᓂᖓᓂᒃ ᓇᓗᓀᕐᓯᑐᐃᓐᓇᕆᐊᓕᓐᓂᒃ ᓄᐃᑦᓯᑌᓕᒐᓱᐊᖃᑦᑕᓗᑎᒃ.
ᖃᕆᑕᐅᔭᓂᒃ ᐊᑐᓲᑦ ᓄᐃᓯᒍᒪᑐᐊᕈᑎᒃ ᐊᑦᔨᖑᐊᓂᒃ ᑕᑯᓐᓇᕋᑦᓴᓕᐊᕕᓂᕐᓂᓘᓐᓃᑦ ᖃᕆᑕᐅᔭᒥᑦᑎᐊᑎᓐᓄᑦ, ᐊᖏᕐᑕᐅᓯᒪᕐᖄᕆᐊᓖᑦ ᐊᑦᔨᖑᐊᓂᑦᑐᐃᑦ ᖃᓄᐃᑦᓴᖏᑐᐊᕐᐸᑕ ᑭᓯᐊᓂ ᓄᐃᑕᐅᔨᐊᖃᕋᓗᐊᕈᑎᒃ ᐊᑦᔨᖑᐊᒥᓂᒃ ᑌᒣᑦᑎᓯᒍᓐᓇᑐᑦ.
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᒪᓕᒐᓕᐊᕆᓯᒪᔭᒥᓂᒃ ᒪᓕᑦᑕᐅᑎᑦᓯᖃᑦᑕᕆᐊᖃᕐᒪᑕ ᒪᓕᖃᑦᑕᕆᐊᖃᕐᓱᑎᓪᓗ ᓇᐅᑐᐃᓐᓇᓄᑦ ᖃᐅᔨᒪᔭᐅᒋᐊᖃᖕᖏᑐᐃᑦ ᐱᑦᔪᑎᒋᓗᒋᑦ ᐃᓄᓐᓅᓕᖓᑦᓱᑎᒃ ᖃᐅᔨᒪᔭᐅᒋᐊᖃᖕᖏᑐᐃᑦ ᒥᑦᓵᓄᑦ ᐱᕙᑦᑕᒥᓂᒃ ᓇᐅᑐᐃᓐᓇᓄᑦ ᖃᐅᔨᔭᐅᒋᐊᖃᖕᖏᑐᓂᒃ, ᐱᓗᐊᕐᑐᒥᒃ ᓇᐅᑐᐃᓐᓇᓄᑦ ᑕᑯᔭᐅᕐᖃᔭᖕᖏᑐᓂᒃ ᑐᓴᕐᑎᓯᖃᑦᑕᐅᑎᒍᑎᐅᓲᑎᒍᑦ. ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐊᑕᐅᓯᓪᓗᑯᐊᐱᒻᒥᒃ ᑲᒪᒋᔭᖃᕈᓐᓇᔭᖏᒻᒥᔪᑦ ᑲᒪᒋᔭᐅᖁᔭᐅᔪᒥᒃ ᐅᕝᕙᓘᓐᓃᑦ ᖃᕆᑕᐅᔭᑎᒍᑦ ᓇᓕᐅᒫᓄᑦ ᑕᑯᑦᓴᐅᑎᑦᓯᒍᑎᑎᒍᑦ ᓄᐃᑕᐅᔪᕕᓂᕐᓂᒃ ᐅᕝᕙᓘᓐᓃᑦ ᓄᐃᑦᓯᔪᕕᓂᕐᓂᒃ ᓇᐅᓕᒫᓄᑦ ᖃᐅᔨᔭᐅᒋᐊᖃᖕᖏᑐᓂᒃ.