ᐱᒋᐅᕐᓭᓂᕐᒧᑦ ᓱᓇᓱᐊᕐᓃᑦ
ᑫᓪᓗᑐᐃᓂᕐᒧᑦ ᐊᒻᒪᓗ ᐃᓚᐅᑎᑦᓯᓂᕐᒧᑦ
ᐱᒋᐅᕐᓭᓂᕐᒧᑦ ᓱᓇᓱᐊᕐᓃᑦ
ᐊᑦᔨᒋᖏᑐᓂᒃ ᐱᒋᐅᕐᓭᓂᕐᒧᑦ ᓱᓇᓱᐊᕐᑎᓯᓂᕐᓂᒃ ᑲᔪᓯᑎᑕᐅᔪᖃᓚᐅᔪᕗᖅ ᑐᑭᒧᐊᑦᑎᑕᐅᑦᓱᑎᓪᓗ ᐱᓇᓱᐊᕐᕕᖓᓄᑦ:
ᐱᒋᐅᕐᓴᑎᑦᓯᓂᕐᒧᑦ ᐃᓄᓕᕆᓂᐅᑉ ᐱᓇᓱᒐᖓᓂᒃ (ᐅᕕᒃᑲᓂᒃ ᓴᐳᑦᔨᔨᐅᓂᕐᒥᒃ ᐊᒻᒪᓗ ᓄᓇᓖᑦ ᐋᓐᓂᐊᕕᖓᓂᒃ), ᐊᑦᔨᒋᔭᐅᖏᓂᖃᕐᑐᒥᒃ ᐃᓕᓐᓂᐊᑎᑦᓯᓂᖃᕐᓱᑎᒃ ᐊᐅᓚᑦᓯᓂᕆᐅᑎᖃᕐᓱᑎᓪᓗ
ᐃᑲᔪᕐᓯᒪᐅᑏᑦ ᐃᓄᓕᕆᓂᕐᒧᑦ ᐱᒋᐅᕐᓭᓂᕐᒧᑦ ᑲᔪᓯᑎᑕᐅᓲᑦ ᐱᓇᓱᐊᖃᑎᒋᔭᐅᑎᓪᓗᒋᑦ Marie-Victorin College ᐃᓕᓐᓂᐊᕕᒻᒪᕆᖓᓂᒥᐅᓂᒃ ᑕᒪᐅᖓ ᓄᓇᒨᓕᖓᔪᓄᑦ (ᑕᓯᐅᔭᕐᔪᐊᒧᓪᓗ ᐅᖓᕙᒧᓪᓗ) ᐱᓇᓱᐊᕈᓯᓕᒫᒥ ᐱᒋᐅᕐᓴᑎᑦᓯᓱᑎᒃ 100-ᒐᓚᓐᓄᑦ ᐱᓇᓱᑦᑎᓄᑦ ᐊᕐᕌᒍᑕᒫᑦ. ᑕᒪᒃᑯᑎᒎᓇ ᐃᑲᔪᕐᓯᒪᐅᑎᑎᒍᑦ, ᐱᓇᓱᑦᑏᑦ ᐱᔪᓐᓇᓯᑎᑕᐅᓲᑦ ᓴᓇᕐᕈᑎᑦᓴᖏᓐᓂᒃ ᐱᔪᓐᓇᓯᐊᕈᑎᑦᓴᖏᓐᓂᓗ ᑌᒣᑦᑐᓕᕆᓂᕐᒧᑦ; ᐃᑲᔪᕐᓯᒪᐅᑏᓪᓗ ᐊᔪᐃᓐᓇᕈᑎᒋᑦᓱᒋᑦ ᐱᓇᓱᒐᕐᒥᒃ ᐃᓕᓐᓂᐊᑎᑦᓯᓂᖃᕐᓂᒧᑦ.
ᑕᒪᒃᑯᐊ ᐃᑲᔪᕐᓯᒪᐅᑏᑦ ᑲᔪᓯᑎᑕᐅᒋᐊᖃᕐᓂᖏᑦ ᑌᒪᖕᖓᒐᓛᒃ ᐱᕙᓪᓕᐊᑎᑕᐅᓯᓲᖑᑦᓱᑎᒃ, ᐊᒻᒪᓗ ᐊᕐᕌᒍᒥᑦ ᐊᕐᕌᒍᒧᑦ ᐱᔪᓐᓇᓯᓕᐅᒥᓯᓲᖑᑦᓱᑎᒃ ᐱᔪᓐᓇᓯᐊᕆᐊᓕᒥᓂᒃ, ᑐᑭᓯᒪᓂᒃᑯᓗ ᐱᓂᐊᕐᓂᑯᓗ.
ᐃᓄᐃᑦ ᑲᒪᒋᔭᐅᓂᖏᑦᑕ ᐱᒋᐅᕐᓭᓂᕐᒧᑦ ᐃᑲᔪᕐᓯᒪᐅᑎᖏᑦ
ᑕᒪᒃᑯᐊ ᐃᓕᓐᓂᐊᕕᒻᒪᕆᑦᑎᒍᑦ ᐃᓕᓐᓂᐊᑕᐅᒍᓐᓇᑐᐃᑦ ᑲᔪᓯᑎᑕᐅᓲᖑᒻᒪᑕ ᒪᑭᐅᓪᓗ ᐃᓕᓐᓂᐊᕕᒻᒪᕆᖓᑕ ᐋᓐᓂᐊᓂᓕᕆᓂᕐᒥᓗ ᐃᓄᓕᕆᓂᕐᒥᓗ ᐱᒍᑦᔨᔨᖏᓐᓄᑦ ᑲᒪᒋᔭᖃᕐᓂᒧᑦ ᐃᓕᑕᕆᔭᐅᒍᑎᑖᕐᑎᓯᔨᖏᓐᓄᑦ, 30-ᓂᒃ ᐱᔭᕆᒋᐊᓕᓐᓂᒃ ᐃᓕᓐᓂᐊᑕᐅᓲᑦᓴᔭᕐᒧᑦ.
ᑕᒪᒃᑯᐊ ᐃᓄᐃᑦ ᑌᒣᑦᑐᓕᕆᓂᕐᒥᒃ ᐃᓕᓐᓂᐊᑎᑕᐅᒍᓐᓇᓲᑦ ᑲᒪᒋᔭᖃᕐᓂᒧᑦ ᐃᓂᒋᔭᐅᓂᖃᕐᑐᓂᒃ.
ᐃᓕᓐᓂᐊᑎᑦᓯᓂᕐᒧᑦ ᓱᖏᐅᓯᓴᕐᑕᐅᔪᖃᕐᑎᓗᒍ ᐃᓚᐅᖃᑕᐅᕙᓪᓕᐊᔪᖃᕐᓂᒧᓪᓗ
ᐃᓗᓐᓇᑎᒃ ᓄᑖᑦ ᐱᓇᓱᑦᑏᑦ ᑎᑭᑐᐊᕈᑎᒃ ᑕᒫᐅᖓ ᓄᓇᒧᑦ (ᐅᑦᑑᑎᒋᓗᒍ ᒪᓐᑐᔨᐊᒥᑦ) ᐃᓚᐅᖃᑕᐅᒋᐊᖃᓲᑦ ᒪᕐᕉᓂᒃ ᐅᓪᓗᓂᒃ ᓱᖏᐅᓯᓭᓂᕐᒧᑦ ᒪᓐᑐᔨᐊᒥ ᑲᑎᒪᑎᑕᐅᑦᓱᑎᒃ. ᑕᒪᒃᑯᐊ ᐃᓕᓭᓃᑦ ᐃᑲᔪᕐᓂᖃᓲᑦ ᑎᑭᕐᖃᒥᓐᓂᒃ ᑐᑭᓯᒍᑎᐅᓂᕐᓴᐅᓱᑎᒃ ᓄᓇᕕᒻᒥ ᐃᓅᓯᕐᒥᒃ ᐊᒻᒪᓗ ᐃᓄᐃᑦ ᐃᓗᕐᕈᓯᖓᓂᒃ. ᑕᒪᓐᓇ ᐃᓗᕐᕈᓯᕐᒥᒃ ᐃᓕᓭᓂᖅ ᑲᔪᓯᑎᑕᐅᓲᖑᑦᓱᓂ ᐃᓄᑐᐃᓐᓇᒧᑦ ᓲᓱᒋᔭᐅᑦᓯᐊᕆᐊᖃᕐᒪᑕ ᐃᓄᐃᑦ ᐃᓪᓕᕆᔭᖏᓪᓗ ᐱᐅᓯᖏᓪᓗ.
ᐋᓐᓂᐊᕕᓐᓂ ᐱᓇᓱᐊᕐᑕᐅᔪᓄᑦ
ᐊᓐᓂᐊᕕᓐᓂ ᐱᓇᓱᐊᕐᑕᐅᔪᐃᑦ ᐊᑖᒍᑦ ᐊᑦᔨᒋᖏᑐᓂᒃ ᐱᒋᐅᕐᓴᒐᑦᓴᓂᒃ ᑲᔪᓯᑎᑕᐅᔪᖃᓲᖑᒻᒪᑦ ᒪᑯᓄᖓ ᐃᓕᖓᔪᓄᑦ ᐱᐊᕋᑦᓴᕆᔭᐅᑦᓱᑎᒃ ᐃᒻᒥᐊᓗᒍᑕᐅᓲᓄᑦ ᐱᐊᕋᑦᓴᓄᑦ ᐊᒻᒪᓗ ᐃᒻᒥᓂᐊᕐᑌᓕᒪᓂᕐᒥᒃ.
ᑫᓪᓗᑐᐃᓂᕐᒧᑦ ᐊᒻᒪᓗ ᐃᓚᐅᑎᑦᓯᓂᕐᒧᑦ
ᓄᓇᕕᐅᑉ ᑕᑯᓐᓈᑕᐅᓂᖓᓄᑦ
ᐱᒋᐊᕐᑎᑕᐅᒪᑦᓱᓂ 2014-ᒥ, ᓄᓇᕕᐅᑉ ᑕᑯᓐᓈᑕᐅᓂᖓ - ᑫᓪᓗᑐᐃᓂᕐᒧᓗ ᐃᓚᐅᑎᑦᓯᓂᕐᒧᓗ ᖃᐅᔨᔭᐅᑎᑦᓯᒐᓱᐊᕐᓂᐅᓱᓂ - ᑲᖏᑦᓴᑎᑦᓯᒐᓱᐊᕈᑎᐅᑦᓱᓂ ᑭᐅᒍᑎᐅᓗᑎᓪᓗ ᐊᐱᕆᐅᑎᓂᒃ ᑕᒪᑦᓱᒧᖓ ᐋᓐᓂᐊᓂᓕᕆᓂᒃᑯᓗ ᐃᓄᓕᕆᓂᒃᑯᓗ ᐱᒍᑦᔨᓂᕐᒧᑦ ᓄᓇᕕᒻᒥ. ᑖᒃᑯᐊ ᖃᐅᔨᔭᐅᑎᑦᓯᒐᓱᐊᕈᑏᑦ ᐱᒋᐊᕐᑎᑕᐅᓯᒪᓕᕐᑐᑦ ᐊᒥᓱᒐᓚᓐᓂᒃ ᑐᖕᖓᕕᖃᕐᑎᓗᒋᑦ ᓇᒻᒥᓂᖅ ᖃᕆᑕᐅᔭᒦᑎᑦᓯᒍᑎᖃᕐᓱᑎᒃ ᐊᒻᒪᓗ ᓄᐃᑕᒍᓐᓇᓲᖑᓱᑎᒃ Facebook-ᑯᑦ ᐊᒻᒪᓗ LinkedIn-ᑯᑦ. ᐊᑦᔨᒋᖏᑐᓂᒃ ᐅᓂᒃᑳᑕᐅᔪᖃᕐᐳᖅ ᖃᕆᑕᐅᔭᒃᑯᑦ ᑕᑯᑦᓴᐅᑎᑕᐅᔪᖃᕐᑎᓗᒍ ᐊᑦᔨᒋᖏᑐᓂᒃ ᐱᓇᓱᒐᕐᓂᓗ ᐃᓕᓐᓂᐊᕋᑦᓴᓂᓪᓗ ᐱᕕᑦᓴᐅᑎᑕᐅᔪᓂᒃ ᑕᒫᓂ ᐋᓐᓂᐊᓂᓕᕆᓂᒃᑯᓗ ᐃᓄᓕᕆᓂᒃᑯᓗ ᐱᒍᑦᔨᒍᑎᖏᑦᑎᒍᑦ. ᑕᒪᓐᓇ ᖃᐅᔨᔭᐅᑎᑦᓯᒐᓱᐊᕐᓂᖅ ᑐᕌᖓᑎᑕᐅᔪᖅ ᐱᔪᑦᓴᐅᔮᕐᑎᓯᒐᓱᐊᕈᑎᐅᑦᓱᓂ ᓄᓇᓕᓕᒫᑦ ᐃᓄᖏᓐᓂᒃ ᐊᑦᔨᒋᖏᑐᓄᑦ ᐱᓇᓱᒐᕐᓄᑦ ᑎᒥᖁᑎᑦᑎᓄᑦ ᐃᖏᕐᕋᓯᐊᕈᑎᐅᓂᐊᕐᑐᒧᑦ, ᒪᑯᓂᖓ ᐊᓪᓚᓯᒪᔪᓕᕆᔩᑦ, ᑮᓇᐅᔭᓕᕆᔨᒻᒪᕆᒃ, ᖃᐅᔨᒪᔩᑦ, ᖃᐅᔨᓴᕐᕕᖓᓂ ᖃᐅᔨᒪᔪᐃᓪᓗ, ᓄᓇᒃᑯᔫᓕᐅᕐᑎᓂᓪᓗ, ᖃᕆᑕᐅᔭᓕᕆᔨᓂᓗ, ᐃᒐᔨᓂᒃ ᐊᓯᖏᓐᓂᓗ. ᑕᒪᓐᓇ ᖃᐅᔨᔭᐅᑎᑦᓯᒐᓱᐊᕐᓂᖅ ᑕᑯᑦᓴᐅᑎᑦᓯᓲᖑᒻᒥᔪᖅ ᐃᓕᓐᓂᐊᕕᒻᒪᕆᒻᒥ ᐱᓇᓱᒐᙯᓐᓇᕐᒧᓗ ᑐᑭᓯᑎᑦᓯᒋᐊᕐᕕᓂᒃ ᑫᓪᓗᑐᐃᒍᑎᐅᒐᓱᐊᕐᑐᓂᒃ ᐱᓇᓱᒐᕐᓄᑦ ᐊᑦᔨᒋᔭᐅᓂᖃᓪᓗᐊᖏᑦᑐᓄᑦ ᓄᓇᕕᒻᒥ.
ᐃᓕᓐᓂᐊᕕᒻᒧᑦ ᐳᓛᕆᐊᕐᓂᖃᓲᖑᒻᒥᔪᑦ ᑫᓪᓗᑐᐃᒐᓱᐊᕈᑎᐅᑎᓪᓗᒍ ᐱᓇᓱᒐᕐᓂᒃ ᐊᑐᐃᓐᓇᐅᑎᑕᐅᔪᓂᒃ ᑌᒣᑦᑐᓕᕆᓂᕐᓄᑦ ᑕᒪᒃᑯᓄᖓ ᐃᓕᓐᓂᐊᑏᑦ ᐊᑯᓐᓂᖏᓐᓄᑦ ᑐᓴᕐᑎᓱᒋᓪᓗ ᐃᓕᓐᓂᐊᑕᐅᒍᓐᓇᑐᓂᒃ ᐊᑐᐃᓐᓇᐅᔪᓂᒃ. ᐳᓛᕆᐊᕐᓯᒪᓕᑐᐊᕋᒥᒃ ᐊᑕᐅᓯᕐᒥ ᐅᓪᓗᒥᒃ ᖃᓄᐃᓕᐅᕈᑎᖃᓯᓲᑦ ᐳᓛᕆᐊᕐᑕᐅᒍᑎᒋᓯᒪᔭᕐᒥᓂᒃ ᐃᓚᖃᕐᓗᑎᒃ ᓄᓇᓖᑦ ᐊᓐᓂᐊᕕᖓᓂᒃ. ᑕᒪᒃᑯᓄᖓ ᐃᓕᓐᓂᐊᑏᑦ ᓱᓀᑦ ᐱᓇᓱᐊᕐᑕᐅᒋᐊᖃᕐᒪᖔᑕ ᑕᑯᓐᓈᑕᐅᓗᑎᓪᓘᓂᐊᕐᑐᑦ ᐊᒻᒪᓗ ᐃᓕᑦᓯᕙᓪᓕᐊᓱᑎᒃ ᓱᓇᓂᒃ ᐊᑐᕐᑐᖃᕆᐊᖃᕐᒪᖔᑦ.
