ᐊᑑᑎᒋᐊᓕᒻᒥᓄᑦ ᒪᓕᒐᕐᑎᒍᑦ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔩᑦ ᐃᑉᐱᒍᓱᑦᑎᓯᒋᐊᓪᓛᕋᓱᓲᑦ ᐃᓄᑐᙯᑦ ᖃᓄᐃᖕᖏᓯᐊᕐᓂᖏᓐᓄᑦ ᐊᒻᒪᓗ ᓄᕐᖃᑎᑦᓯᒐᓱᐊᕐᓂᒥᒃ ᐱᑦᓯᐊᖏᓐᓂᒥᒃ ᐋᓐᓂᑎᕆᓂᕐᒥᓗ ᐃᓄᒻᒪᕆᓂᒃ ᓴᐳᒻᒥᓂᖃᑦᓯᐊᖏᑦᑐᓂᒃ. ᐊᕐᕌᒍᑕᒫᑦ, ᒪᕐᕈᕕᑦᓱᑎᒃ ᐊᐅᓚᑦᓯᓲᑦ ᑐᓴᕋᑦᓴᓂᒃ ᐱᒻᒪᕆᐅᔪᓂᒃ ᓲᓱᑦᓴᓯᐊᕐᓂᒧᑦ ᓄᓇᓕᓕᒫᓂ—ᐃᓄᑐᙯᑦ ᓴᐳᒻᒥᔭᐅᑦᓯᐊᓂᖏᓐᓂᒃ ᔫᓂᒥ ᐊᒻᒪᓗ ᐃᓄᑐᙯᑦ ᓴᐳᒻᒥᔭᐅᑦᓯᐊᓂᖏᓐᓂᒃ ᐆᑑᐱᕆᒥ—ᑐᓴᕐᑎᓯᓂᕐᒧᑦ, ᐃᓚᐅᑎᑦᓯᓯᐊᕐᓂᒧᑦ, ᐊᒻᒪᓗ ᐊᑑᑎᖁᔨᓂᕐᒧᑦ ᓄᓇᕕᓕᒫᓂ. ᓄᐃᑦᓯᓲᖑᒻᒥᕗᒍᑦ ᑐᓂᔨᓲᖑᒻᒥᓱᑕᓗ ᑐᓴᕐᑎᓯᒍᑎᓂᒃ ᐃᑉᐱᒍᓱᒋᐊᓪᓛᑎᑦᓯᒍᓐᓇᑐᓂᒃ ᑐᓴᕋᑦᓴᓂᓪᓗ ᐃᑲᔪᕐᑐᓂᒃ ᐃᓕᑦᓯᓯᒪᑦᓯᐊᓂᕐᒥᒃ ᐊᒻᒪᓗ ᐅᖄᖃᑎᒌᑦᓯᐊᓂᕐᒥᒃ.
ᓄᓇᕕᒻᒥ ᑐᓴᕋᑦᓭᑦ ᐱᒻᒪᕆᐅᔪᑦ ᓲᓱᑦᓴᓯᐊᕐᓂᒧᑦ ᐃᓄᑐᙯᑦ ᐱᒻᒪᕆᐅᑦᓯᐊᓂᖏᓐᓂᒃ: ᑲᑐᑦᔨᖃᑎᒌᑦᓯᐊᓗᑕ ᐃᓄᑐᖃᕗᑦ ᓴᐳᒻᒥᓂᖃᑦᓯᐊᓂᖏᓐᓄᑦ ᖃᓄᐃᖕᖏᓯᐊᕐᓂᖏᓐᓄᓗ
ᐊᕐᕌᒍᑕᒫᑦ ᔫᓂ 15-ᒥ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔩᑦ (NRBHSS) ᐊᐅᓚᑦᓯᓲᑦ ᑐᓴᕋᑦᓂᒃ ᐱᒻᒪᕆᐅᔪᓂᒃ ᓲᓱᑦᓴᓯᐊᕐᓂᒧᑦ ᐃᓄᑐᙯᑦ ᐱᒻᒪᕆᐅᑦᓯᐊᓂᖏᓐᓂᒃ—ᑕᒪᓐᓇ ᐱᓇᓱᐊᕐᑕᐅᔪᑦ ᓄᓇᓕᓕᒫᓂ ᐃᑉᐱᒍᓱᑦᓯᐊᕆᐊᓪᓛᓂᕐᒧᑦ ᐃᓄᑐᙯᑦ ᐱᑦᓯᐊᑕᐅᓲᖑᖕᖏᒋᐊᖏᓐᓂᒃ ᐋᓐᓂᑎᕐᑕᐅᓲᖑᓂᖏᓐᓂᓗ ᐊᒻᒪᓗ ᐱᒻᒪᕆᐅᑎᑦᓯᓯᐊᕐᓂᒧᑦ ᐃᓄᑐᙯᑦ ᐱᒻᒪᕆᐅᑦᓯᐊᓂᖏᓐᓂᒃ ᓄᓇᓕᕗᓐᓂ.
ᐃᓘᓐᓇᑕ ᑕᒪᑐᒥᖓ ᑲᒪᑦᓯᐊᕆᐊᖃᕐᖁᒍᑦ
ᐃᓄᑐᙯᑦ ᐱᑦᓯᐊᑕᐅᖕᖏᑑᒍᓐᓇᖁᑦ ᐋᓐᓂᑎᕐᑕᐅᒍᓐᓇᓱᑎᓪᓗ ᖃᓄᑐᐃᓐᓇᖅ—ᐃᑉᐱᓂᐊᕐᓂᑎᒍᑦ, ᑎᒥᒻᒥᑎᒍᑦ, ᐃᓱᒪᒥᑎᒍᑦ, ᐅᕝᕙᓗ ᑮᓇᐅᔭᒃᑯᑎᒍᑦ,—ᐊᒻᒪᓗ ᖃᐅᑕᒫᑲᓵᖅ ᖃᐅᔨᔭᐅᓲᖕᖏᑐᑦ ᐅᕝᕙᓗ ᐅᖃᕐᑕᐅᓲᖑᖕᖏᑐᑦ. ᐃᓚᒋᔭᐅᑐᐊᕈᕕᓪᓘᓃᑦ, ᑲᒪᔨᒋᔭᐅᒍᕕᓪᓘᓃᑦ, ᓯᓚᕐᖃᑎᒋᔭᐅᒍᕕᓪᓘᓃᑦ, ᐅᕝᕙᓗ ᐱᖃᑎᒋᔭᐅᒍᕕᓪᓘᓃᑦ/ᐃᓚᓐᓈᒋᔭᐅᒍᕕᓪᓘᓃᑦ, ᐃᑉᐱᒍᓱᑦᓯᐊᕆᐊᖃᕐᖁᑎᑦ ᐃᓄᑐᙯᑦ ᑲᒪᒋᔭᐅᑦᓯᐊᕋᓗᐊᕐᒪᖔᑕ ᐱᑦᓯᐊᑕᐅᓲᖑᒐᓗᐊᕐᒪᖔᑕᓗ, ᓲᓱᒋᔭᐅᑦᓯᐊᓲᖑᒐᓗᐊᕐᒪᖔᑕᓗ ᓲᓱᒋᔭᐅᒋᐊᖃᕐᒪᑕ.
ᑐᓴᕋᑦᓭᑦ ᐱᒻᒪᕆᐅᔪᑦ ᓲᓱᑦᓴᓯᐊᕐᓂᒧᑦ 2025-ᒥ ᐅᑯᓂᖓ ᐱᒻᒪᕆᐅᑎᑦᓯᔪᑦ
ᐊᕐᕌᒎᔪᒥ ᑐᓴᕋᑦᓭᑦ ᐱᒻᒪᕆᐅᔪᑦ ᓲᓱᑦᓴᓯᐊᕐᓂᒧᑦ ᐊᑑᑎᔪᑦ ᖃᓄᐃᑦᑐᑐᐃᓐᓇᓂᒃ ᓱᖃᑦᓯᓂᕐᓂᒃ ᐱᕕᑦᓴᓂᓪᓗ ᐃᑲᔪᕐᓂᒧᑦ ᑐᓴᕐᑎᓯᑦᓯᐊᓂᕐᒧᑦ, ᐃᓚᐅᑎᑦᓯᓯᐊᕐᓂᒧᑦ, ᐊᒻᒪᓗ ᐱᕙᓪᓕᐊᑎᑦᓯᓂᕐᒧᑦ ᓄᓇᓕᓐᓂ ᓄᓇᓕᓕᒫᓂ:
- ᑐᓴᕋᑦᓭᑦ ᐊᒥᓱᑦ ᑕᒪᑐᒪᐅᑉ ᒥᑦᓵᓄᑦ ᐊᓪᓚᑖᕐᕕᑯᑦ ᑐᔪᕐᑕᐅᓛᕐᑐᑦ: ᓴᓇᖕᖑᐊᑕᕕᓂᕐᓂᒃ ᓂᐱᓲᓂᒃ ᐁᑦᑐᑕᐅᓛᕐᑐᑦ ᓄᓇᕕᒻᒥᐅᓕᒫᑦ ᐊᓂᕐᕋᖏᓐᓄᑦ, ᐱᒻᒪᕆᐅᑎᑦᓯᓗᑎᒃ ᐃᑉᐱᓂᐊᕐᓂᓂᒃ ᐋᓐᓂᑎᕐᑕᐅᓲᓂᒃ ᐱᕕᑦᓴᓂᓪᓗ.
- ᑐᓴᕋᑦᓭᑦ ᐃᓕᓐᓂᐊᕋᑦᓭᓗ ᓲᓱᑦᓴᓯᐊᕐᓂᒧᑦ ᕓᔅᐳᒃ-ᑯᑦ: ᑐᓴᕋᑦᓭᑦ ᐃᓕᓐᓂᐊᕋᑦᓭᓗ ᓲᓱᑦᓴᓯᐊᕐᓂᒧᑦ ᐊᑐᐃᓐᓇᐅᓛᕐᑐᑦ ᖃᕆᑕᐅᔭᒃᑯᑦ ᒪᕐᕉᓂᒃ ᐱᓇᓱᐊᕈᓰᓐᓂᒃ ᓴᐳᑦᔨᓯᐊᕐᓂᒧᑦ ᐃᓄᑐᙯᑦ ᖃᓄᐃᖕᖏᓯᐊᕐᓂᖏᓐᓄᑦ ᐊᒻᒪᓗ ᑲᒪᑦᓯᐊᓂᕐᒧᑦ ᓄᓇᓕᓐᓂ.
- ᐃᓄᑐᖃᕐᓅᓕᖓᓪᓚᕆᓱᑎᒃ ᑲᑎᒪᓂᐊᕈᓰᑦ: ᐸᕐᓇᓂᕐᒧᑦ ᐱᓇᓱᑦᑕᐅᔪᑦᓴᓕᐅᕐᓂᒧᓪᓗ ᐱᓇᓱᐊᕐᑏᑦ ᑲᑎᒪᓂᐊᕈᓯᖃᕐᑎᓯᓚᐅᔪᕗᑦ ᒪᕐᕈᐃᓕᕿᖓᔪᒥᒃ ᑌᔭᐅᓂᖃᕐᑎᓱᒍ “ᓯᕗᓂᕆᓗᒍ ᖃᓄᐃᖕᖏᓯᐊᕆᐊᖃᕐᓂᖓ, ᓲᓱᒋᔭᐅᑦᓯᐊᕆᐊᖃᕐᓂᖓ ᐊᑦᑕᓇᕐᑐᒦᒋᐊᖃᖕᖏᓂᖓᓗ ᐃᓄᑐᖃᑦᑕ”. ᐊᑦᔨᒌᖕᖏᑐᖅ ᓄᓇᓕᓐᓂ ᑎᒥᖁᑎᒋᔭᐅᔪᑦ ᑲᑎᒪᓂᖃᕐᑎᑕᐅᓚᐅᔪᑦ ᔫᓂᓕᒫᒥ.
ᐊᑏ ᐅᑯᐊ ᐊᑑᑎᓚᐅᒃᑭᑦ
ᐊᑏ ᑕᑯᒋᐊᓚᐅᕆᑦ ᐊᑦᓯᔭᐅᒪᒍᑎᕗᓐᓂᒃ ᖃᕆᑕᐅᔭᒥ ᐊᒻᒪᓗ ᒪᓕᓚᐅᕆᑦ ᐅᕙᑦᑎᓂᒃ ᕓᔅᐳᒃᑯᑦ ᑕᑯᓂᐊᕋᕕᑦ ᐊᑑᑎᔭᐅᒍᓐᓇᑐᓂᒃ ᐱᕕᑦᓴᓂᓪᓗ ᐃᑲᔪᕈᓐᓇᑐᓂᒃ ᐃᓕᓐᓂᒃ ᐃᑲᔪᕈᒪᑐᐊᕈᕕᑦ ᐃᓄᒻᒥᒃ ᐃᓅᓯᕐᓂ, ᐃᓕᑕᕐᓯᓂᕐᒧᑦ ᐊᒻᒪᓗ ᐸᓯᔭᑦᓴᓕᐅᕐᓂᒧᑦ ᐋᓐᓂᑎᕇᓲᒥᒃ, ᐊᒻᒪᓗ ᑐᓴᐅᒣᓐᓇᓯᐊᕈᒪᒍᕕᑦ ᑐᓴᕋᑦᓴᓂᒃ ᐃᓕᓐᓂᐊᕋᑦᓴᓂᓪᓗ ᓲᓱᑦᓴᓯᐊᕐᓂᒧᑦ ᐃᓄᑐᙯᑦ ᖃᓄᐃᖕᖏᓯᐊᕐᓂᖏᓐᓄᑦ ᑕᕐᕿᖓᓂ ᐊᑑᑎᔭᐅᓛᓯᔪᒥᒃ ᐅᑦᑑᐱᕆ 2025-ᒥ.
ᐊᑏ ᑲᔪᓯᑦᓯᐊᑕ ᒪᑭᑕᑦᓯᐊᓗᑕ ᑲᑐᑦᔨᖃᑎᒌᑦᓯᐊᓗᑕ—ᓴᐳᒻᒥᓯᐊᕐᓂᒧᑦ, ᓲᓱᑦᓴᓯᐊᕐᓂᒧᑦ, ᐊᒻᒪᓗ ᓲᓱᑦᓴᓯᐊᕐᓗᑕ ᐃᓄᑐᙯᑦ ᐱᒻᒪᕆᐅᑦᓯᐊᓂᖏᓐᓂᒃ.
ᑲᑐᑦᔨᖃᑎᒌᑦᓯᐊᓗᑕ, ᑲᔪᓯᑦᓯᐊᕈᓐᓇᖁᒍᑦ ᓴᐳᒻᒥᓯᐊᕐᓗᑕ, ᓲᓱᑦᓴᓯᐊᕐᓗᑕᓗ, ᐊᒻᒪᓗ ᓲᓱᑦᓴᓯᐊᕐᓗᑕ ᐃᓄᑐᖃᕗᓐᓂᒃ ᓄᓇᕕᒻᒥᐅᓂᒃ ᐱᒻᒪᕆᐅᑦᓯᐊᓂᖏᓐᓂᒃ.