ᓱᓇᐅᕙ ᖁᐱᕐᕈᖅ ᑐᖁᓐᓇᑐᖅ?
ᖁᐱᕐᕈᖅ ᑐᖁᓐᓇᑐᖅ ᐆᒪᔪᓄᑦ ᑐᖁᒍᑕᐅᓲᖅ ᐃᓄᓐᓄᓗ ᓄᑭᖏᓐᓅᑐᐊᕋᒥ.
ᖃᓄᖅ ᖁᐱᕐᕈᑯᑦ ᑐᖁᓐᓇᑐᖅ ᐃᓄᒻᒨᓲᖑᕙ ᐆᒪᔪᓄᓪᓗ?
ᖁᐱᕐᕈᖅ ᑐᖁᓐᓇᑐᖅ ᐆᒪᔫᑉ ᖃᓂᖓᓃᓲᖅ ᓄᕙᖓᓂᑦᓱᓂ ᑮᓯᑐᐊᕐᒪᑕ ᐅᕝᕙᓗᓗᓐᓃᑦ ᕿᓱᑦᑕᐅᑐᐊᕋᒥᒃ ᐊᓯᖓᓄᑦ ᐆᒪᔪᒧᑦ ᐃᓄᒻᒧᓗᓐᓃᑦ. ᐃᕐᐸᕈᓐᓇᒥᔪᖅ ᓄᕙᖓ, ᖃᕆᑕᖓ ᐅᕝᕙᓗᓗᓐᓃᑦ ᕿᒥᕐᓗᖓᑕ ᐃᒪᖓ (ᑲᑭᐊᑦᑑᓱᓂ ᐃᒪᖅ ᖃᕆᑕᖓᓃᑦᑐᖅ ᕿᒥᕐᓗᒐᓂᓗ) ᑭᓕᕐᓯᒪᔪᒧᑦ ᐊᑦᑐᐃᑐᐊᕐᒪᑦ ᐅᕝᕙᓗᓗᓐᓃᑦ ᒪᒥᓕᔭᕐᕕᖃᑐᐊᕐᒪᑦ ᐃᔨᓐᓂᒃ, ᕿᖓᕐᒥᒃ ᖃᓂᕐᒥᓗᓐᓃᑦ.
ᐆᒪᔪᐃᑦ ᐱᓱᑦᑎᓕᒫᑦ ᖁᐱᕐᕆᓲᑦ ᑐᖁᓐᓇᑐᒥᒃ, ᐃᓚᐅᑎᓪᓗᒋᑦ ᓂᕐᔪᑏᑦ (ᐱᓗᐊᕐᑐᒥᒃ ᑎᕆᒐᓐᓂᐊᑦ ᐊᒪᕈᐃᓪᓗ) ᕿᖕᒥᓂᓪᓗ ᑲᐳᕐᑕᐅᒣᑦᑐᓂ.
ᖁᐱᕐᕈᒧᑦ ᑐᖁᓐᓇᑐᒧᑦ ᐱᔭᐅᓐᓂᐊᕈᒪ ᖃᓄᐃᓘᕐᓗᖓ ᓇᒻᒥᓂᖅ ᓴᐳᒻᒥᒋᐊᖃᕐᖁᖓ?
ᐋᓐᓂᐊᓯᐅᕐᑎᓕᐊᑦᓴᐅᑎᒋᓗᑎᑦ ᐋᓐᓂᐊᓯᐅᕐᑎᒪᕆᒻᒧᓗᓐᓃᑦ ᓄᓇᓕᑦᓯᓂ. ᖃᐅᔨᓴᕐᑕᐅᒐᔭᕐᑐᑎᑦ ᖃᓄᑎᒋᒃ ᐊᑦᑕᓇᕐᒪᖔᕐᐱᑦ ᐋᓐᓂᐊᓯᐅᕐᑕᐅᒍᑎᒋᒋᐊᓕᑎᓐᓂᓗ ᐋᓐᓂᐊᓯᐅᕐᑕᐅᓗᑎᑦ. (ᐱᓇᓱᐊᕈᓯᓕᒫᒥ ᐊᑑᑎᔭᐅᑎᑕᐅᓲᖅ) ᑎᒥᐅᑉ ᓄᑭᖏᓐᓅᖏᓐᓂᖓᓂ.
ᑮᔭᐅᒍᕕᑦ ᐃᒪᕐᒧᑦ ᑯᕕᔭᐅᑎᑦᓴᐅᑎᒋᓗᒍ ᐅᕝᕙᐅᑎᓕᒻᒧᑦ 10-15 ᑎᑦᑖᐱᓐᓂ ᖁᐱᕐᕈᒧᑦ ᐱᕈᕐᕕᐅᒌᒃᑯᑎᐅᒐᔭᕐᑐᖅ. ᐃᑲᔪᕐᑕᐅᓴᐅᑎᒋᓗᑎᑦ ᑭᖑᓂᖓᒍᑦ.
ᖃᓄᐃᓘᕐᑕᐅᓗᖓ ᐋᓐᓂᐊᓯᐅᕐᑕᐅᒐᔭᕐᖁᖓ?
ᑭᒡᒌᑦ ᐋᓐᓂᐊᓯᐅᕐᑕᐅᖄᕋᔭᕐᑐᖅ ᐃᒪᕐᒧᑦ ᑯᕕᓗᒍ 10-15 ᑎᑦᑖᐱᓐᓂ. ᑖᓐᓇ ᐱᔭᕆᐊᑭᑦᑑᓱᓂ ᐋᓐᓂᐊᑖᕋᔭᕐᓂᓂᒃ ᒥᑭᓕᐅᒥᑎᑦᓯᒐᔭᕐᑐᖅ.
ᖁᐱᕐᕈᒧᑦ ᑐᖁᓐᓇᑐᒧᑦ ᑲᐴᑎ (ᑲᐱᔭᐅᒍᑎ) ᐊᒻᒪᓗ ᖁᐱᕐᕈᒧᑦ ᑐᖁᓐᓇᑐᒧᑦ ᓄᖑᑎᑦᓯᒐᓱᐊᕈᑏᑦ (ᐋᓐᓂᐊᒥᒃ ᐹᒍᑏᑦ) ᐊᑐᕐᑕᐅᑎᑕᐅᖁᔭᐅᒐᔭᕐᑐᑦ.
ᐆᒪᔪᖅ ᑮᓯᔪᖅ ᖃᓄᐃᑦᑑᔮᖕᖏᐸᑦ ᐃᑉᐱᒋᔨᖃᕈᓐᓇᐸᑦ (ᕿᖕᒥᓄᑦ ᐊᓂᕐᕋᒥᐅᑕᓄᑦ), ᑲᐴᑎᓂᒃ ᐊᑐᕆᐊᖃᕐᓂᖅ ᐊᑑᑎᔭᐅᑦᓴᐅᑎᒋᒐᔭᖕᖏᑐᖅ.
ᖃᓄᐃᓘᕐᓗᑕ ᓇᒻᒥᓂᖅ ᓄᓇᓕᑦᑎᓂᓪᓗ ᖁᐱᕐᕈᒥᒃ ᑐᖁᓐᓇᑐᕐᑖᑌᓕᒍᓐᓇᕿᑕ?
- ᕿᖕᒥᑎᑦ ᑲᐱᔭᐅᑎᓗᒋᑦ. ᕿᖕᒥᑎᑦ ᑲᐱᔭᐅᒪᑎᑦᓯᐊᓗᒋᑦ ᑐᖁᓐᓇᑐᒥᒃ ᖁᐱᕐᕈᑖᕇᒃᑯᑎᒧᑦ. ᓄᓇᓕᓐᓂᒃ ᓴᐳᒻᒥᒍᓐᓇᑐᑎᑦ ᕿᖕᖏᒥᓂᒃ ᑲᐳᕐᑕᐅᑎᑦᓯᓗᑎᑦ. ᕿᖕᒦᑦ ᑲᐳᕐᑕᐅᓯᒪᔪᑦ ᖁᐱᕐᕆᒍᓐᓇᖏᑦᑐᑦ ᑐᖁᓐᓇᑐᒥᒃ ᓴᐳᒻᒥᒍᓐᓇᓱᑎᓪᓗ ᓄᓇᓕᑦᓯᓂᒃ ᑎᕆᒐᓐᓂᐊᓂᑦ. ᓄᓇᓕᓯ ᑲᕙᒫᐱᖓ ᐅᖃᕈᓐᓇᑐᖅ ᖃᖓᒃᑯᑦ ᕿᖕᒦᑦ ᑲᐳᕐᑕᐅᓛᓕᕐᒥᒪᖔᑕ
- ᐱᐊᕃᑦ/ᑲᒃᑲᓛᑦ ᐃᓕᓐᓂᐊᑎᑕᐅᓗᑎᒃ ᐊᑦᑕᓇᕐᑐᒦᒌᒃᑯᑎᓂᒃ ᕿᖕᒥᓂᓪᓗ ᐅᐃᕕᓴᕐᑌᓕᓂᕐᒥᒃ.
- ᐃᑉᐱᒍᓱᑦᓯᐊᓗᑎᑦ ᓂᕐᔪᑎᓂᒃ. ᐃᓄᑐᙯᑦ ᐊᔪᖀᒋᐊᕈᑎᖏᑦ ᓈᓚᑦᓯᐊᓗᒋᑦ ᐃᓄᐃᓪᓗ ᖃᐅᔨᒪᔭᑐᖃᖏᑦ (ᐃᓄᐃᑦ ᖃᐅᔨᒪᐅᓯᖏᑦ). ᑎᕆᒐᓐᓂᐊᓂᒃ ᑲᒪᒍᓐᓀᓗᑎᑦ, ᐱᓗᕐᐊᑐᒥᒃ ᐋᓐᓂᐊᒍᓇᐅᑉᐸᑕ ᐱᐅᓯᕐᓱᓯᐊᖕᖏᐸᑕᓗ. ᓴᓂᐊᓃᓪᓗᐊᑌᓕᓗᑎᑦ.
- ᐊᒻᒥᕆᓕᕈᕕᑦ ᐃᑉᐱᒍᓱᑦᓯᐊᓗᑎᑦ ᑐᖁᓐᓇᑐᒥᒃ ᖁᐱᕐᕈᑖᕐᑌᓕᓗᑎᑦ. ᓂᕐᔪᑏᑦ ᐱᐅᓯᕐᓱᓯᐊᖕᖏᑐᑦ ᐋᓐᓂᐊᒍᓇᐅᑦᓱᑎᓪᓗ ᖁᐱᕐᕈᖃᕈᓇᐅᑦᓱᑎᑦ ᑐᖁᓐᓇᑐᒥᒃ ᐋᑦᑐᑕᐅᒋᐊᖃᖕᖏᑐᑦ.
- ᐋᓐᓂᐊᕕᓕᐊᑦᓴᐅᑎᒋᓗᑎᑦ ᑮᔭᐅᒍᕕᑦ ᕿᓱᑦᑕᐅᒍᕕᓪᓘᓃᑦ ᓂᕐᔪᑎᒧᑦ ᕿᖕᒥᒧᓪᓘᓃᑦ.
ᖁᐱᕐᕈᒧᑦ ᑐᖁᓐᓇᑐᒧᑦ ᐋᓐᓂᐊᑖᕐᑌᓕᒍᑎᒥᒃ ᑲᐳᕐᑕᐅᒍᑎᖃᕈᓐᓇᖁᖓ?
ᐋ, ᐱᓇᓱᒐᓖᑦ ᖁᐱᕐᕈᒧᑦ ᑐᖁᓐᓇᑐᒧᑦ ᐊᑦᑕᓇᕈᓐᓇᑐᓂᒃ ᐆᑦᑐᕋᐅᑎᒋᑦᓱᒋᑦ ᕿᖕᒥᓂᒃ ᑲᐳᕐᑎᐅᓲᑦ ᕿᖕᒥᓂᐊᕐᑏᓗᓐᓃᑦ ᑲᐱᔭᐅᓯᒪᓲᑦ. ᑌᒣᒐᓗᐊᕐᑎᓗᒍ, ᑲᐱᔭᐅᓯᒪᒐᓗᐊᕋᒥᒃ, ᓱᓇᒥᑦᓯᐊᑐᒥᒃ ᓴᐳᒻᒥᔭᐅᓯᒪᓲᖑᖕᖏᑐᑦ. ᑌᒣᒻᒪᑦ, ᐆᒪᔪᒧᑦ ᖁᐱᕐᕆᓯᒪᔪᒧᑦ ᑐᖁᓐᓇᑐᒥᒃ ᑮᔭᐅᓐᓂᕈᑎᒃ ᕿᓱᑦᑕᐅᓂᕈᑎᓪᓘᓃᑦ ᐋᓐᓂᐊᕕᓕᐊᑦᓴᐅᑎᒋᒋᐊᓖᑦ, ᐃᑭᒥᓂᒃ ᐅᕝᕙᑕᐅᑎᑦᓯᒋᐊᕐᑐᓗᑎᒃ, ᒪᕐᕈᒋᐊᓪᓛᓂᓪᓗ ᑲᐱᔭᐅᓗᑎᒃ.
ᑌᒣᒐᓗᐊᕐᑎᓗᒍ, ᑮᔭᐅᓚᐅᕋᓂ ᑲᐴᑎᑦ ᐊᑭᓕᒃ ᐊᑭᓕᕐᑕᐅᓯᒪᓲᖅ ᐱᓇᓱᕝᕕᒋᔭᐅᔪᒧᑦ.
ᕿᖕᒥᒥᒃ ᓂᕐᔪᑎᒥᓪᓘᓃᑦ ᐱᐅᓯᕐᓱᓯᐊᖕᖏᑐᒥᒃ ᖃᐅᔨᒍᒪ ᑭᓇᒧᑦ ᐅᖃᕆᐊᖃᕐᖁᖓ?
ᓄᓇᓕᐅᑉ ᑲᕙᒫᐱᖓᓂᒃ ᖃᐅᔨᑎᑦᓯᓴᐅᑎᒋᒋᐊᖃᕐᑐᑎᑦ.
Also read:
- Abundance of Arctic Foxes: Risk of Rabies and Coexistence in Northern Regions (Gouvernement du Québec)