ᐊᐅᐸᓗᑦᔭᑳᓐᓇᖅ ᓄᓇᕐᔪᐊᓕᒫᒥ ᓄᐃᓲᖅ. ᑯᐯᒻᒥ, ᐊᒥᓱᒐᓓᑦ ᐊᐅᐸᓗᑦᔭᑳᑦᑐᑦ ᖃᐅᔨᔭᐅᓯᒪᓕᕐᑐᖅ 2024 ᐱᒋᐊᕐᖃᒥᐅᑎᓪᓗᒍᓂᑦ. ᐃᓚᖏᑦ ᐊᐅᐸᓗᑦᔭᑳᓚᕿᔪᕕᓃᑦ ᓄᓇᒧᑦ ᐊᐅᐸᓗᑦᔭᑳᓐᓇᑕᓕᒻᒧᑦ ᐁᓯᒪᑦᓱᑎᒃ. ᑭᓯᐊᓂ ᐊᓯᖏᑦ ᖃᐅᔨᔭᐅᒪᔪᑦ ᑯᐯᒻᒥ ᐊᐅᐸᓗᑦᔭᑳᓐᓇᖅ ᓄᐃᓯᒪᓕᕐᑎᓗᒍ ᐁᑦᑐᑕᕕᓂᐅᑦᓱᑎᒃ. ᐊᐅᐸᓗᑦᔭᑳᓐᓇᖅ ᒫᓐᓇᐅᑎᓪᓗᒍ ᓄᐃᑕᔪᖅ.
ᖃᐅᔨᒍᒪᒍᕕᑦ ᐊᐅᐸᓗᑦᔭᑳᓕᓚᕿᕕᐅᑐᐃᓐᓇᕆᐊᓕᓐᓂᒃ, ᐊᐅᐸᓗᑦᔭᑳᑐᐃᓐᓇᕆᐊᓕᓐᓂᓗ, ᖃᓄᐃᓘᕆᐊᖃᕈᑕᐅᔪᓂᓪᓗ ᐅᕗᖓ ᑕᑯᒋᐊᕈᓐᓇᑐᑎᑦ Measles outbreak.
ᑕᒡᒐᓂ ᑕᑯᒋᐊᕐᕕᒥ ᐅᑯᐊ ᓄᐃᑕᔪᑦ:
- ᑐᑭᓯᓇᕐᑎᓯᒍᑏᑦ
- ᒪᓗᓐᓇᐅᑏᑦ
- ᐋᓐᓂᐊᓯᐅᕐᑕᐅᒍᑏᑦ
- ᐱᔭᕆᐊᑦᑐᓯᒪᒍᑎᐅᒍᓐᓇᑐᑦ
- ᐁᑦᑐᑑᑎᐅᒍᓐᓇᓂᖓ
- ᓴᐳᑎᓯᒪᒐᓱᐊᕈᑏᑦ ᓯᕗᕐᖐᓯᒪᒍᑏᓪᓗ
- ᑭᓇᒃᑯᑦ ᐊᐅᐸᓗᑦᔭᑳᓕᕈᓐᓇᖃᑦ
- ᐱᓪᓗᑯᒋᐊᖃᕈᑏᑦ
ᑐᑭᓯᓇᕐᑎᓯᒍᑏᑦ
ᐊᐅᐸᓗᑦᔭᑳᓐᓇᖅ ᑲᑉᐱᐊᓇᓪᓚᕆᑦᑐᖅ ᐁᑦᑐᑑᑎᐅᒍᐊᕐᑐᒪᕆᐅᑦᓱᓂᓗ. ᐊᐅᐸᓗᑦᔭᑳᓐᓇᖅ ᐋᓐᓂᐊᓕᕈᑕᐅᓲᖅ ᐊᓂᕐᓂᑯᑦ ᐁᑦᑑᑎᐅᑦᓱᓂ ᐊᐅᐸᓗᑦᔭᑳᓐᓇᑕᓕᐅᑉ ᐃᓅᑉ ᐊᓂᕐᓂᖓᒍᑦ, ᖁᐃᑦᑐᓂᖓᒍᑦ, ᐅᖄᓂᑐᐃᓇᓂᖓᒍᓪᓘᓃᑦ.
ᐊᐅᐸᓗᑦᔭᑳᓐᓇᖅ ᐃᕐᐸᒪᓚᕆᓚᐅᕐᑐᕕᓂᖅ ᐊᒥᐊᔨᑫᑦ ᑲᓇᑕᒥᐅᓪᓗ ᓄᓇᖓᓂ. ᓄᐃᑕᓪᓗᐊᓲᖑᒍᓐᓀᑐᖅ ᑲᐴᕐᑕᐅᒍᑎᐅᓲᖑᓕᕐᓱᓂ. ᐅᓪᓗᒥᐅᓕᕋᓗᐊᕐᑎᓗᒍ, ᐊᐅᐸᓗᑦᔭᑳᓐᓇᑐᖅ ᓄᐃᑲᓪᓛᖏᓐᓇᑐᖅ ᑯᐯᒻᒥ.
ᐊᐅᐸᓗᑦᔭᑳᓐᓇᖅ ᑐᖁᒍᑕᐅᓂᕐᐸᐅᓲᖑᖏᓐᓇᑐᖅ ᐱᐊᕌᕈᕐᓄᑦ ᓄᓇᕐᔪᐊᓕᒫᒥ. ᐊᑦᑕᓇᖕᖏᑐᑦᓯᐊᒥᒃ ᑲᐳᕆᒍᑎᒥᒃ ᐊᑐᐃᓐᓇᐅᔪᖃᑦᓯᐊᑐᖅ ᑕᑦᓱᒥᖓ ᖃᓂᒪᑖᕆᒃᑯᑎᐅᒍᓐᓇᑐᒥᒃ.
ᒪᓗᓐᓇᐅᑏᑦ
ᓯᕗᓪᓕᐹᑦ ᐊᐅᐸᓗᑦᔭᑳᓂᒥᒃ ᒪᓗᒍᓯᓕᕈᑎᐅᒍᓐᓇᑐᑦ ᐅᑯᐊ:
- ᐆᓇᕿᓂᖅ
- ᓱᕐᓗᑯᑦ ᐅᒥᖕᖓᓯᓂᖅ ᑲᒃᑭᓕᑦᓱᓂᓗ
- ᖁᐃᕐᑐᓂᖅ
- ᐃᔩᒃ ᐊᐅᐸᓗᑦᓯᓯᒪᔫᒃ
- ᐃᔩᒃ ᕿᕐᖓᕖᖕᖓᑑᒃ
- ᐃᓱᕐᕆᖏᓪᓚᕆᓐᓂᖅ
ᐊᓱᐃᓛ ᑮᓇᖅ ᑎᒥᓕᒫᕐᓗ ᓄᐃᕕᐅᓂᐊᓕᕐᒪᑦ ᐊᐅᐸᓗᑦᔭᑳᓄᑦ.
ᐅᓪᓗᐃᑦ 5-21-ᓄᑦ ᐃᓗᐊᓂ (10-14-ᖑᒍᓐᓇᑐᑦ) ᐊᐅᐸᓗᑦᔭᑳᓐᓇᐅᑉ ᖁᐱᕐᕈᖓᓂᒃ ᐱᑕᑦᓯᔪᕕᓂᐅᓗᓂ ᒪᓗᓐᓇᐅᑏᓪᓗ ᓄᐃᖃᑦᑕᓕᕐᑎᓗᒋᑦ ᐃᓄᒃ ᐁᑦᑑᑎᖃᕈᓐᓇᓕᕐᑐᖅ 4 ᐅᓪᓗᐃᑦ ᐊᐅᐸᓗᑦᔭᑳᑦ ᓄᐃᓚᐅᕐᑎᓇᒋᑦ ᐁᑦᑑᑎᖃᕈᓐᓇᓚᖓᓕᕐᓱᓂᓗ 4 ᐅᓪᓗᐃᑦ ᓈᓯᒪᓕᕋᓗᐊᕐᑎᓗᒋᑦ ᖃᓂᒻᒪᑐᕕᓂᐅᓕᕐᓗᓂ.
ᐊᐅᐸᓗᑦᔭᑳᓐᓂᖅ ᐱᓇᓱᐊᕈᓯᓕᒫᕈᓐᓇᑐᖅ ᒪᕐᕈᓂᓪᓘᓃᑦ ᐱᓇᓱᐊᕈᓯᕐᑐᓗᓂ.
ᐁᑦᑐᑐᑎᐅᑦᓴᐅᑎᒋᐊᐱᒍᓐᓇᒪᑦ, ᒪᓗᓐᓇᐅᑎᖃᕈᕕᑦ, ᐅᖄᓚᒋᐊᖃᕐᑐᑎᑦ ᐋᓐᓂᐊᕕᒻᒧᑦ ᐅᕝᕙᓗᓐᓃ Info-Sante-ᒧᑦ 811 ᐋᓐᓂᐊᕕᓕᐊᓚᐅᕐᓇᒃ. ᐋᓐᓂᐊᓯᐅᕐᑎᓄᑦ ᐅᖃᐅᑎᔭᐅᓕᕋᔭᕐᑐᑎᑦ ᖃᓄᐃᓘᕆᐊᖃᕐᒪᖔᑉᐱᑦ ᐁᑦᑐᑑᑎᖃᕐᑌᓕᖁᔭᐅᒧᑦ ᐋᓐᓂᐊᕕᓕᐊᓚᐅᕐᓇᒃ.
ᐋᓐᓂᐊᓯᐅᕐᑕᐅᒍᑏᑦ
ᐋᓐᓂᐊᓯᐅᕆᒍᑎᓪᓚᕆᖃᖕᖏᑐᖅ ᐊᐅᐸᓗᑦᔭᑳᑦᑐᒥᒃ. ᑲᐱᔭᐅᒪᓂᖅ ᐱᐅᓂᕐᐸᐅᖏᓐᓇᑐᖅ ᓴᐴᓗᑕᕐᑖᓯᒪᐅᑎᒋᒍᓐᓇᕋᕕᐅᒃ. ᐊᐅᐸᓗᑦᔭᑳᒍᕕᑦ ᐃᒣᒋᐊᖃᕐᑐᑎᑦ:
- ᐊᓂᕐᕋᓯᒪᒋᐊᖃᕐᑐᑎᑦ
- ᐃᓄᓐᓃᑌᓕᒋᐊᖃᕐᑐᑎᑦ
- ᑕᙯᕐᓯᓯᐊᕆᐊᖃᕐᑐᑎᑦ
- ᐃᒥᑦᓯᐊᖃᑦᑕᕆᐊᖃᕐᑐᑎᑦ ᐱᓗᐊᕐᑐᒥᒃ ᐃᒪᑐᐃᓐᓇᒥᒃ
- ᐆᓇᕇᒃᑯᑎᓂᒃ ᐃᕐᖃᕈᓐᓇᑐᑎᑦ ᕆᐊᖃᑐᐊᕈᕕᑦ
ᐱᔭᕆᐊᑦᑐᓯᒪᒍᑎᐅᒍᓐᓇᑐᑦ
ᐱᔭᕆᐊᑦᑐᓯᒪᒍᑎᐅᒍᓐᓇᑐᑦ ᐊᐅᐸᓗᑦᔭᑳᑦᑐᖃᓕᕈᓂ :
- ᓯᐅᓯᕆᓂᖅ (5% 9%-ᖏᑦ ᖃᓂᒻᒪᑐᐃᑦ ᑌᒣᓲᑦ)
- ᐃᑎᑦᑕᖏᓐᓇᓕᒫᕐᓂᖅ, ᐱᓗᐊᕐᑐᒥᒃ ᐃᓅᓕᕐᖃᒥᐅᔪᓂ
- ᐳᕙᒃᑯᑦ ᐃᒻᒪᓯᒪᓂᖅ (1-ᒥᑦ 5%-ᖏᑦ ᖃᓂᒻᒪᑐᐃᑦ ᑌᒣᓲᑦ)
- ᖀᕐᓱᓂᖅ (ᑎᒥᒃ ᕿᕋᑦᑕᖃᑦᑕᓱᓂ ᓄᑮᓪᓗ ᐃᒻᒥᓂᕿᑦᓱᑎᒃ ᕿᓗᕐᕿᖃᑦᑕᑎᓪᓗᒋᑦ)
- ᑐᓵᕐᖃᔦᕐᓂᖅ ᑕᐅᑐᖕᖏᓕᕐᓂᓘᓐᓃᑦ
- ᖃᕆᑕᖅ ᓱᒃᑯᒪᕆᒍᓐᓇᑐᖅ 1 1,000-ᓂ ᖃᓂᒻᒪᑐᓂ ᑌᒣᓱᖅ)
- ᑐᖁᒍᑕᐅᒍᓐᓇᑐᖅ (1 3,000-ᓂ ᖃᓂᒻᒪᑐᓂ ᑌᒣᓱᖅ)
ᑭᓇᒃᑯᑦ ᐱᔭᕆᐊᑦᑐᓯᒪᒍᑎᐅᔪᓄᑦ ᐊᑦᑕᓇᕐᑐᒦᓚᕿᔭᐅᒍᓐᓇᓂᕐᐸᐅᕙᑦ
ᐱᔭᕆᐊᑦᑐᓯᒪᒍᑏᑦ ᐅᑯᓇᓂ ᓄᐃᓂᕐᐸᐅᓲᑦ:
- ᐱᐊᕌᕈᕐᓂ ᐅᑭᐅᖃᕋᑕᖕᖏᑐᓂ
- ᐃᓄᓐᓂ ᑎᒥᒥᒍᑦ ᖃᓂᒪᓂᒃ ᐹᒍᑎᖃᑦᓯᐊᖏᑦᑐᓂ ᓴᖕᖏᓕᔭᐅᒪᓗᑎᒃ ᐊᓯᖏᓐᓄᑦ ᐋᓐᓂᐊᑦ ᑲᒪᒋᔭᐅᒍᑎᖏᓐᓄᑦ ᐅᕝᕙᓗᓐᓃᑦ ᐋᓐᓂᐊᖃᓪᓚᕆᒍᑎᒃ ᐅᑦᑑᑎᒋᓗᒍ ᐊᐅᒃᑯᑦ ᑲᒡᒍᑎᖃᕐᓂᖅ
- ᐱᐊᕋᑦᓴᓖᑦ ᑲᐱᔭᐅᓯᒪᑦᓯᐊᖏᑐᐊᕈᑎᒃ ᐊᐅᐸᓗᑦᔭᑳᕇᒃᑯᑎᒧᑦ
ᐱᐊᕋᑦᓴᓖᑦ ᐊᐅᐸᓗᑦᔭᑳᓕᕐᑐᑦ ᐱᐊᕋᑦᓭᓕᑐᐃᓐᓇᕆᐊᓖᑦ ᐃᓅᓕᑲᐱᔨᐊᖃᕐᓗᑎᓪᓘᓃᑦ. ᐊᐅᐸᓗᑦᔭᑳᓐᓇᐅᑉ ᖁᐱᕐᕈᖓᓂᒃ ᐱᑕᑦᓯᔪᕕᓂᐅᒍᑎᒃ ᐊᓐᓂᐊᕕᒻᒥᓂᒃ ᖃᐅᔨᑎᑦᓯᓴᐅᑎᒋᒋᐊᓖᑦ ᖃᐅᔨᓴᕐᑕᐅᒍᓐᓇᓯᓂᐊᕋᒥᒃ, ᓯᕗᕐᖐᓯᒪᒍᑎᐅᔪᓂᓪᓗ ᐋᓐᓂᐊᓯᐅᑎᑐᕐᑎᑕᐅᓗᑎᒃ.
ᐁᑦᑐᑑᑎᐅᒍᓐᓇᓂᖓ
ᐊᐅᐸᓗᑦᔭᑳᓐᓇᖅ ᐁᑦᑐᑑᑎᐅᑦᓴᐅᑎᒋᐊᐱᒍᓐᓇᑐᖅ. ᖃᓂᒪᓐᓇᒥᒃ ᐱᑕᑦᓯᔪᖃᑐᐃᓐᓇᕆᐊᓕᒃ ᖃᓂᒪᔪᒥᒃ ᖃᓂᑕᖃᓚᐅᕋᑕᖕᖏᑲᓗᐊᕈᓂ. ᐅᑦᑑᑎᒋᓗᒍ, ᐃᓪᓗᒦᖃᑎᖃᕐᓂᖅ ᖃᓂᒪᑕᓕᒻᒥᒃ, ᐊᑯᓂᐅᖕᖏᑐᐊᐱᐅᒐᓗᐊᒥ. ᖁᐱᕐᕈᖅ ᐆᒪᒍᓐᓇᑐᖅ ᐊᓂᕐᑎᕆᔭᐅᔪᒥ ᐃᕐᐸᕈᓐᓇᓱᓂᐊᓪᓛᑦ. ᖃᓂᒪᓐᓇᖅ ᐁᑦᑑᑎᐅᒍᓐᓇᒥᔪᖅ ᐊᑦᑑᐃᔪᕕᓂᐅᓂᒃᑯᑦ ᖃᓂᒪᔪᒥᒃ ᐅᕝᕙᓗᓐᓃᑦ ᓱᓇᒐᓚᑐᐃᓐᓇᒥᒃ ᖁᐱᕐᕈᑯᓗᑦᑕᓯᔪᕕᓂᕐᒥᒃ.
ᓴᐳᑎᓯᒪᒐᓱᐊᕈᑏᑦ ᓯᕗᕐᖐᓯᒪᒍᑏᓪᓗ
ᓯᕗᕐᖐᓯᒪᓂᖅ ᐁᑦᑐᑑᑎᓂᕐᒥᒃ
ᖃᓂᒪᔪᑦ ᐊᓂᕐᕋᓯᒪᒋᐊᓖᑦ ᓯᑕᒪᓂᒃ ᐅᓪᓗᓂᒃ ᐊᐅᐸᓗᑦᔭᑳᒃ ᓄᐃᔪᕕᓂᐅᓕᕐᑎᓗᒍ. ᐯᕆᑦᓯᕕᓕᐊᕆᐊᖃᖕᖏᑐᑦ, ᐃᓕᓐᓂᐊᕕᓕᐊᕆᐊᖃᖕᖏᑐᑦ ᐅᕝᕙᓗᓐᓃᑦ ᐱᓇᓱᒋᐊᕐᑐᕆᐊᖃᕋᑎᒃ.
ᖃᓂᑕᖃᕐᑌᓕᒋᐊᓖᑦ ᐱᐊᕌᕈᕐᓂᒃ, ᐱᐊᕋᑦᓴᓕᓐᓂᒃ ᐃᓄᓐᓂᓗ ᑎᒥᒥᒍᑦ ᖃᓂᒪᓂᒃ ᐹᒍᑎᖃᑦᓯᐊᖏᑦᑐᓂᒃ.
ᑲᐱᔭᐅᓂᖅ
ᑲᐱᔭᐅᓂᖅ ᐱᐅᓂᕐᐹᓯᐊᖑᖏᓐᓇᑐᖅ ᐊᐅᐸᓗᑦᔭᑳᓕᕇᒃᑯᑎᐅᑦᓱᓂ.
ᐊᐅᐸᓗᑦᔭᑳᒋᒃᑯᑎᒃ ᑲᐴᑎ ᐊᒥᓱᐃᓂᒃ ᖃᓂᒪᓂᒃ ᐅᖑᒪᒍᑎᐅᒍᓐᓇᑐᖅ ᐊᑕᐅᑦᓯᑯᑦ.
Québec’s immunization schedule
ᑯᐯᒻᒥ ᑲᐱᔭᐅᒪᒋᐊᖃᕐᓂᐅᑉ ᐅᓪᓗᖁᑎᖏᓐᓂ, ᐱᐊᕃᑦ ᑲᐱᔭᐅᓲᑦ 12-ᓂᒃ ᑕᕐᕿᖃᓕᕋᒥᒃ 18-ᓂᓗ ᑕᕐᕿᖃᓕᕋᒥᒃ. ᑖᓐᓇ ᑲᐴᑎᒃ ᓴᐴᓗᑕᖃᑦᓯᐊᕈᑎᐅᓯᓲᖅ ᐊᐅᐸᓗᑦᔭᑳᓐᓂᒥᒃ ᐱᑕᑦᓯᕈᐊᕐᑐᕉᑕᕆᕕᖏᓐᓂ. ᑌᒣᒻᒪᑦ ᐱᒻᒪᕆᐊᓘᕗᖅ ᕿᑐᕐᖓᐱᑦ ᑲᐱᔭᐅᒋᐊᖃᕐᓂᖓ ᐅᓪᓗᓕᐅᕐᓯᒪᓗᒍ ᖃᓂᑦᑑᒍᓐᓇᕕᓕᒫᑦᓯᐊᖓᓄᑦ ᐅᑭᐅᕐᑖᕕᖓᓄᑦ. ᑭᖑᕙᕆᐊᕐᑕᑎᒋᐊᖃᖕᖏᑐᖅ ᑲᐱᔭᐅᕕᑦᓴᖓ, ᐊᒥᓱᐃᓂᒃ ᑲᐱᔭᐅᒍᑎᖃᓚᖓᒐᓗᐊᕐᐸᑦ ᑌᑲᓂ ᐅᓪᓗᒥ. ᑮᓇᑐᐃᓐᓇ ᐃᓅᓕᕐᑐᕕᓂᖅ 1970-ᒥ ᑭᖑᓂᐊᒍᓪᓗ ᑲᐱᔭᐅᓚᐅᕐᓯᒪᖕᖏᑐᖅ ᐊᐅᐸᓗᑦᔭᑳᓚᐅᕐᓯᒪᖕᖏᑐᕐᓘᓃᑦ ᑲᐱᔭᐅᒋᐊᓕᒃ.
ᑲᐱᔭᐅᓂᖅ ᐊᑭᖃᖕᖏᑐᓕᐊᖑᓚᐅᕐᓯᒪᑎᓪᓗᒍ ᑲᓇᑕᒥ, ᐊᐅᐸᓗᑦᔭᑳᓐᓂᖅ ᒥᑭᓕᐅᒥᓯᒪᓪᓚᕆᑦᑐᖅ 97%-ᑲᓵᒧᑦ.
ᐃᑉᐱᒍᓱᑦᓯᐊᖁᔭᐅᔪᑦ ᐊᐅᓪᓚᑲᑦᑕᐸᓂᐊᑐᑦ
ᐊᐅᐸᓗᑦᔭᑳᓐᓂᖅ ᓄᐃᑕᒪᑦ ᐊᒥᓱᓂ ᓄᓇᓂ. ᐊᐅᓪᓚᓚᐅᕐᓇᒃ, ᑲᐱᔭᐅᒪᓂᕐᐱᑦ ᕿᑐᕐᖓᐱᓪᓗ ᑲᐱᔭᐅᒪᓂᖓᑕ ᐊᓪᓚᑕᐅᒪᕕᖏᓐᓂᒃ ᓇᔪᕐᑎᖃᑦᓯᐊᖁᔭᐅᔪᑎᑦ ᕿᒥᕐᕈᔭᐅᑎᕐᖄᓯᒪᓗᒋᑦ ᐋᓐᓂᐊᓯᐅᕐᑎᒪᕇᒻᒧᑦ ᐋᓐᓂᐊᓯᐅᕐᑎᒧᓪᓘᓃᖅ. ᖃᐅᔨᒪᒍᒪᒍᕕᑦ ᓴᐴᓗᑕᖃᑦᓯᐊᕋᓗᐊᕐᒪᖔᑉᐱᑦ ᐊᐅᐸᓗᑦᔭᑳᕆᒃᑯᑎᒥᒃ, ᖃᐅᔨᒋᐊᕈᓐᓇᑐᑎᑦ ᐊᐅᓪᓚᓚᖓᔪᑦ ᐋᓐᓂᐊᓯᐅᕐᑕᐅᕕᖓᓂ, ᐋᓐᓂᐊᕕᒻᒥ ᓄᓇᓕᐅᓪᓗ ᐋᓐᓂᐊᕕᐊᐱᖓᓂ ᐅᕝᕙᓗᓐᓃᑦ ᐅᖄᓚᓗᑎᑦ 1-877-644-4545-ᒧᑦ
ᖃᓄᐃᓘᕆᐊᖃᕈᑏᑦ ᑲᐱᔭᐅᒍᒪᓗᓂ
ᖃᐅᔨᒐᓱᐊᑦᓯᐊᖄᓚᐅᑲᒋᐊᖃᕐᑐᑎᑦ ᓴᐴᓗᑕᖃᑦᓯᐊᕋᓗᐊᕐᒪᖔᑉᐱᑦ ᐅᕙᓂ considered protected.
ᑲᐱᔭᐅᓂᖅ ᐊᐅᐸᓗᑦᔭᑳᕇᒃᑯᑎᒧᑦ ᐊᑭᖃᖕᖏᑐᖅ ᑯᐯᑉ ᑲᐴᕐᑕᐅᑎᑦᓯᒍᓯᖓᒍᑦ.
ᑕᑯᒋᐊᕈᓐᓇᑐᑎᑦ ᑯᐯᑉ ᑲᐴᕐᑕᐅᑎᑦᓯᒍᓯᖓᑕ ᖃᐅᔨᒐᓱᐊᕐᑕᐅᕕᖓᓂᒃ ᑐᑭᓯᓂᐊᕋᕕᑦ ᖃᓄᐃᓘᕆᐊᖃᕈᑎᐅᔪᓂᒃ ᑲᐱᔭᐅᒍᒪᓗᓂ ᐅᕙᓂ procedure for getting vaccinated.
ᑭᓇᒃᑯᑦ ᐊᐅᐸᓗᑦᔭᑳᓕᕈᓐᓇᖃᑦ
ᑭᓇᑐᐃᓐᓇᓕᒫᖅ ᖃᓂᒻᒪᕈᓐᓇᑐᖅ ᓴᐴᓗᑕᖃᖕᖏᑯᓂ ᐊᐅᐸᓗᑦᔭᑳᕆᒃᑯᑎᒧᑦ ᐅᕝᕙᓗᓐᓃᑦ ᐊᐅᐸᓗᑦᔭᑳᓚᐅᕐᓯᒪᖕᖏᑯᓂ.
ᐱᓪᓗᑯᒋᐊᖃᕈᑏᑦ
ᐊᐅᐸᓗᑦᔭᑳᓐᓇᖅ ᑐᓴᕐᑕᐅᑎᑕᐅᒋᐊᖃᕐᑐᓴᔭᖅ. ᐋᓐᓂᐊᓯᐅᕐᑏᑦ ᒪᓗᒍᓱᒍᑎᒃ ᖃᐅᔨᒍᑎᓪᓗᓃᑦ ᐊᐅᐸᓗᑦᔭᑳᑦᑐᒥᒃ, ᖃᐅᔨᑎᑦᓯᒋᐊᓖᑦ ᓇᐅᓕᒫᓂᒃ ᖃᓄᐃᖕᖏᓯᐊᕐᑎᓯᒐᓱᐊᕐᑎᓯᔨᓂ ᐊᖓᔪᕐᖃᐅᔪᓂᒃ.
ᐊᐅᐸᓗᑦᔭᑳᓐᓂᖅ ᐃᓕᓐᓂᐊᕕᒻᒥ: ᓱᒋᐊᖃᕐᐱᑕ
ᐃᓕᓐᓂᐊᕕᒃ ᑐᓴᕐᑎᓯᒋᐊᓕᒃ ᐊᐅᐸᓗᑦᔭᑳᕐᑐᖃᕐᐸᑦ ᖃᓄᓪᓗᐊᑎᒋᓪᓗ ᐋᓐᓂᐊᓕᕐᓯᒪᓂᐅᔪᖅ ᐃᑉᐱᒋᓗᒍ, ᑲᐱᔭᐅᒻᒣᑐᐃᑦ ᐊᓂᕐᕋᓯᒪᖁᔭᐅᒍᓐᓇᑐᑦ ᐊᐅᐸᓗᑦᔭᑳᓐᓂᐅᑉ ᓄᐃᓯᒪᓂᖓ ᐊᓂᒍᖕᖏᓂᓕᒫᖓᓂ. ᑖᒃᑯᐊ ᐊᓂᕐᕋᓯᒪᒋᐊᖃᕐᓂᕋᕐᑕᕕᓃᑦ ᐅᑎᕈᓐᓇᑐᑦ ᐃᓕᓐᓂᐊᕕᒻᒧᑦ ᑲᐱᔭᐅᓯᒪᓕᕐᓂᕋᐅᑎᒥᓂᒃ ᓄᐃᑦᓯᓯᐊᑐᐊᕈᑎᒃ. ᑌᒣᒋᐊᖃᕐᑎᑕᐅᓚᕿᔪᖅ ᓴᐳᑎᓯᒪᔭᐅᖁᓪᓗᒋᑦ ᓴᐴᓗᑕᖃᖕᖏᑐᐃᑦ ᐃᓄᐃᑦ ᓄᓇᓕᖓᓗ.
ᐱᓇᓱᐊᕐᕕᒥ
ᐱᓇᓱᐊᕐᕕᓕᒫᑦ ᖃᐅᔨᒪᑎᑦᓯᖁᔭᐅᕗᑦ ᐱᓇᓱᑦᑎᒥᓂᒃ ᐱᓇᓱᐊᕆᐊᕐᑐᓯᒪᑎᕙᑦᑕᒥᓂᓪᓗ ᐱᒻᒪᕆᐅᒋᐊᖓ ᓄᓇᕕᓕᐊᓚᐅᕋᑎᒃ ᓴᐴᓗᑕᖃᑦᓯᐊᕆᐊᖃᕐᓂᒥᒃ ᐊᐅᐸᓗᑦᔭᑳᒋᒃᑯᑎᒧᑦ. ᑖᓐᓇ ᐃᑯᓪᓚᑎᑦᓯᒐᓱᐊᕈᑎᐅᔪᖅ ᓄᐃᔪᕕᓂᐅᔪᖃᑦᓴᐸᑦ ᐊᐅᐸᓗᑦᔭᑳᓐᓂᒥᒃ ᐃᕐᐸᓗᐊᕇᒃᑯᑎᐅᒍᓐᓇᒪᑦ ᖃᓂᒪᓐᓇᐅᑉ ᖁᐱᕐᕈᖓᓄᑦ ᓄᓇᕕᒻᒥ.
ᑐᑭᓯᒋᐊᓪᓚᓯᐊᕈᒪᒍᑦᓯ, ᑕᑯᒋᐊᕈᓐᓇᑐᓯ ᖃᐅᔨᑎᑦᓯᐅᑎᒥᒃ ᐱᓇᓱᑦᑎᓂᒃ.