ᐅᕕᒃᑲᕗᑦ ᖃᓄᐃᑉᐸᑦ?

ᑕᕝᕙᓂ ᐅᑭᐊᑦᓴᒥ 2022, ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓅᓯᓕᕆᓂᕐᒧᓗ ᐱᒍᑦᔨᓂᕐᒧᑦ ᑲᑎᒪᔩᑦ, ᑲᑎᕕᒃ ᐃᓕᓴᕐᓂᓕᕆᓂᕐᓗ ᐃᑲᔪᕐᑎᖃᕐᓱᑎᒃ ᑯᐯᑉ ᐃᓗᓯᓕᕆᔨᒃᑯᖏᓐᓂᒃ (Institut de la statistique du Québec (ISQ)), ᑲᔪᓯᑎᑦᓯᓛᕐᑐᐃᑦ ᓯᕗᓪᓕᐹᒥᓄᓇᕕᒻᒥ ᐳᕐᑐᓂᕐᓴᒥᒃ ᐃᓕᓵᓂᒃ/ᐃᓕᓐᓂᐊᑎᓂᒃ ᐃᓗᓯᓕᕆᓂᕐᒧᑦ ᖃᐅᔨᓴᕐᓂᒃ.

ᑐᕌᒐᓖᑦ ᐃᓗᓯᕐᒥᒃ ᖃᐅᔨᓴᕐᓂᒥᒃ ᐊᑎᓕᒻᒥᒃ ᐅᕕᒃᑫᑦ ᖃᓄᐃᑉᐸᑦ? ᑐᑭᖃᕐᓱᓂ ᐅᕕᒃᑲᕗᑦ ᖃᓄᐃᑉᐸᑦ? ᑐᑭᓯᒍᒪᑦᓱᑕ ᖃᓄᐃᓕᖓᒻᒪᖔᑦ ᐃᓗᓯᖓ ᖃᓄᐃᖕᖏᓯᐊᕐᓂᖓᓗ ᐅᕕᒐᕐᑐᐃᑦ ᓄᓇᕕᒻᒥᐅᑦ. ᑕᒪᓐᓇ ᖃᐅᔨᓴᕐᓂᖅ ᑫᓪᓗᑕᐅᑦᓱᓂ ᑯᐯᒃ ᐃᓗᓯᓕᕆᓂᕐᒧᑦ ᖃᐅᔨᓴᕐᓂᒥᒃ ᐳᕐᑐᓂᕐᓴᒥ ᐃᓕᓴᕐᑐᓂᒃ (QHSHSS). ᓄᑖᒍᓂᕐᐹᖅ ᖃᐅᔨᓴᕐᓂᕕᓂᖅ ᑲᔪᓯᑎᑕᐅᓯᒪᔪᖅ 2016-ᒥᑦ 2017-ᒧᑦ ᑯᐯᓕᒫᒥ, ᔦᒥᔅᐯᒥᓪᓗ ᓄᓇᕕᒻᒥᐅᖏᑐᐃᓐᓇᑐᕐᓗ. 

ᐳᕐᑐᓂᕐᓴᒥ ᐃᓕᓐᓂᐊᑎᓕᒫᑦ ᓄᓇᕕᒻᒥ ᐃᓚᐅᖁᔭᐅᓛᕐᑐᐃᑦ ᖃᐅᔨᓴᕐᓂᒥᒃ. ᑐᓴᐅᒪᔭᐅᒋᐊᓖᑦ ᑲᑎᕐᓱᐃᓃᑦ ᐱᓇᓱᐊᕐᑕᐅᓛᕐᑐᖅ ᐃᓕᓴᕐᕕᒥ ᖃᕆᑕᐅᔭᑎᒍᑦ ᐊᐱᕐᓱᑕᐅᓗᑎᒃ ᓯᕕᑐᓂᓕᓐᓂᒃ 60-ᒥᑦ 90-ᒧᑦ ᐃᑲᕐᕌᐱᓐᓂᒃ. ᐊᐱᕐᓲᑏᑦ ᐅᑯᓄᖓᓄᐊᖓᓗᐊᖕᖑᐊᓛᕐᑐᑦ ᐃᓅᓯᕐᒥ ᐊᑐᓗᑭᑦᑕᐅᓲᓄᑦ, ᐃᓱᒪᒧᑦ ᑎᒥᐅᓪᓗ ᖃᓄᐃᖕᖏᓯᐊᕐᓂᖓᓄᑦ ᐃᓅᖃᑎᖃᕐᓂᒧᓪᓗ.

ᐃᓕᓐᓂᐊᑎᓄᑦ 14 ᒥᑦᓯᑎᓐᓄᑦ ᐅᑭᐅᓕᓐᓄᑦ, ᐊᖏᕐᓯᒪᐅᑎᒃ ᐊᖓᔪᕐᖄᒧᑦ ᑲᒪᔨᖓᓄᓘᓐᓃᑦ ᑭᖕᖒᒪᒋᔭᐅᓛᕐᑐᖅ. ᑐᓴᐅᒪᔭᐅᒋᐊᓕᒃ ᑲᑎᕐᓱᑕᕕᓂᖅ ᐃᓚᐅᔪᕕᓂᕐᒥᒃ ᑭᓇᑐᐃᓐᓇᒧᑦ ᑐᓴᕐᑕᐅᖃᔭᓛᖕᖏᑐᖅ.