ᑯᕕᐊᓲᑎᖃᕐᓂᖅ ᓯᓚᑐᔫᓂᕐᒥᒃ ᕿᒻᒪᑯᐃᓯᒪᓂᕐᒥᓗ ᓄᓇᕕᒻᒥ
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐅᐱᒍᓱᑦᓱᑎᒃ ᖃᐅᔨᒪᔭᐅᖁᔨᕗᑦ ᐱᒋᐊᕐᑎᑕᐅᓯᒪᓂᖓᓂᒃ ᐃᓄᒻᒪᕇᑦ ᐅᓪᓗᖁᑎᖓᑕ ᓇᐅᓕᒫᓂᒃ ᑐᓴᐅᒪᑎᑦᓯᒍᑕᐅᓂᖓᑕ, ᑕᕐᕿᓕᒫᒥ ᖁᕕᐊᓲᑎᖃᕐᓂᖅ ᐅᐱᒋᔭᐅᓂᖃᕐᑎᓗᒋᑦ ᖁᕕᐊᓲᑎᒋᔭᐅᑎᓪᓗᒋᓪᓗ ᐃᑲᔪᕐᓯᒪᖃᑕᐅᓂᕆᓲᖏᑦᑕ ᐃᓄᒻᒪᕇᑦ ᓄᓇᓕᑦᑎᓂ. ᐅᒃᑑᐸ 1, 2024-ᒥ ᐱᒋᐊᕐᑐᒥᒃ, ᑕᒪᓐᓇ ᓇᐅᓕᒫᓂᒃ ᑐᓴᐅᒪᑎᑦᓯᒍᑕᐅᓂᖓ ᓄᐃᑕᑎᑦᓯᒍᑕᐅᖃᑦᑕᓛᕐᖁᖅ ᐃᓄᐃᑦ ᐃᓕᕐᖁᓯᖓᑕ ᕿᒻᒪᑯᐃᒍᑕᐅᓲᒍᓂᖓᓂᒃ, ᓯᓚᑐᔫᓂᖏᓐᓂᓗ, ᖃᐅᔨᒪᔭᖏᓐᓂᓗ ᐃᓄᒻᒪᕆᑦᑕ ᓄᓇᕕᒻᒥᐅᓂᒃ ᑐᓴᕐᑎᓯᒍᑎᒋᓲᖏᓐᓂᒃ.
ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᐱᓯᒪᑦᓱᓂ - ᐃᓗᓯᕐᓱᓯᐊᕐᓂᖅ, ᖃᓄᐃᖕᖏᓯᐊᕐᓂᖅ, ᐊᒻᒪᓗ ᐃᓅᖃᑎᒌᑦᓯᐊᓂᖅ - ᓇᐅᓕᒫᓂᒃ ᑐᓴᐅᒪᑎᑦᓯᒍᑎ ᖃᐅᔨᒪᑎᑦᓯᓂᐅᓛᕐᖁᖅ ᑎᒥᒃᑯᑦ, ᐃᑉᐱᓂᐊᕐᓂᑯᑦ ᐃᓅᓯᒃᑯᑦ ᒪᑭᑕᑦᓯᐊᕆᐊᖃᕐᓂᖏᓐᓂᒃ ᐃᓄᒻᒪᕆᑦᑕ. ᐊᑦᔨᒌᖕᖏᑐᓂᒃ ᓱᑎᑕᐅᓂᖃᖃᑦᑕᓛᕐᑐᑦ ᐱᒋᐊᕐᑎᑕᐅᓂᖃᖃᑦᑕᓗᓂᓗ ᐱᑐᑦᓯᒪᖃᑎᒌᒍᑎᑦᓴᖏᑦ ᓄᓇᓕᒻᒦᑐᑦ ᐃᓄᒻᒪᕆᑦᑎᓂᒃ, ᑭᖑᕚᕇᑦ ᑲᓱᓕᐅᒥᓗᑎᒃ, ᖁᕕᐊᓲᑎᐅᑎᓪᓗᒋᓪᓗ ᐱᔭᑦᓴᕆᒋᐊᖃᓲᖏᑦ ᐃᓄᒻᒪᕇᑦ ᐃᓅᖃᑎᒌᑎᒍᑦ.
ᑌᒪᖕᖓᓂᐊᕐᔪᖅ ᐃᓄᑐᙯᑦ ᓱᖑᓂᕆᔭᐅᓯᒪᕗᑦ ᐃᓅᖃᑎᒌᑦᑐᓄᑦ ᓯᓚᑐᓂᕐᒥᒍᑦ ᓯᕗᓕᕐᓯᒪᒐᒥᒃ ᐊᓐᓇᐅᒪᒍᓐᓇᖁᓪᓗᑕ.
ᓴᐱᓕᕐᓯᕇᑦᑑᓂᕐᒥᒃ, ᐊᓯᑦᔨᑕᕐᑐᑯᓪᓗ ᐃᓅᒍᓐᓇᓂᕐᒥᒃ ᓲᓱᒋᔭᖃᑦᓯᐊᓂᕐᒥᓗ ᐊᔪᕿᑦᑑᑎᖃᕐᓯᒪᔪᑦ. ᑕᒪᓐᓇ ᐅᓪᓗᒥᐅᓕᕐᑐᖅ ᓱᓕᖏᓐᓇᑐᖅ. ᓄᑖᖑᓕᕐᑐᒥᒃ ᐃᓅᓯᖃᓕᕋᓗᐊᕐᑎᓗᑕ, ᐊᑑᑎᓯᒪᔭᖏᑦ ᑕᓯᐅᕐᓯᒍᑎᐅᒍᓐᓇᖏᓐᓇᑐᑦ ᐅᕙᑦᑎᓂᒃ ᐊᓐᓇᐅᒪᒍᓐᓇᖏᓐᓇᖁᓪᓗᑕ ᐊᓯᑦᔨᓯᒪᓕᕐᑑᒐᓗᐊᒥ ᐃᓅᓯᕐᒥ ᐅᓪᓗᒥᐅᔪᖅ. ᐃᓄᑐᙯᑦ ᐃᓚᐅᑎᑕᐅᕙᓪᓕᑦ ᑐᓴᐅᒪᔭᐅᑎᑦᓯᓂᐊᕐᒪᑕ ᐊᑑᑎᓯᒪᔭᒥᓂᒃ ᖃᐅᔨᒪᔭᒥᓂᓪᓗ, ᐱᒻᒪᕆᐅᓂᖓᓂᓪᓗ ᐃᓚᒌᑦ ᓄᓇᓕᐅᓪᓗ ᑲᒪᒋᐅᑎᑦᓯᐊᕆᐊᖃᕐᓂᖓᑕ.
---- Minnie Grey
ᓄᓇᕕᒻᒥ ᐃᓄᒻᒪᕆᓐᓄᑦ ᐅᓪᓗᖁᑎ ᓇᐅᓕᒫᓂᒃ ᑐᓴᐅᒪᑎᑦᓯᒍᑕᐅᑎᓪᓗᒍ ᐊᑑᑎᔭᐅᓛᕐᑐᑦ:
- ᓄᓇᕕᓕᒫᒥᑦ ᕿᓂᕐᓂᖅ ᐱᓇᓱᐊᕐᑕᐅᒍᒪᔪᓂᒃ: ᕿᓄᒍᑎᓕᐅᕐᓗᓯ ᓄᓇᓕᒻᒥ ᐱᓇᓱᐊᕐᑕᐅᒍᒪᒐᔭᕐᑐᓂᒃ ᐆᑦᑐᕋᐅᑎᒋᑦᓱᒋᑦ ᐅᓂᒃᑳᑐᐊᕐᓃᑦ ᐃᓕᕐᖁᓯᓕᕆᓃᑦ ᖁᕕᐊᓲᑎᑦᓴᐅᑎᓪᓗᒋᑦ ᐃᓄᒻᒪᕆᓐᓂᒃ. ᐊᖏᕈᑕᐅᔪᑦ ᕿᓄᒍᑏᑦ ᑮᓇᐅᔭᖃᕐᑎᑕᐅᒐᔭᕐᑐᑦ ᖃᐅᔨᒪᑎᑦᓯᒍᑕᐅᓗᑎᓪᓗ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᓄᑦ.
- ᐃᓄᒻᒪᕇᑦ ᐅᓪᓗᖁᑎᖓᓅᓕᖓᔪᑦ ᑕᑯᓐᓇᕋᑦᓭᑦ: ᑕᑯᓐᓇᕋᑦᓴᐅᓛᕐᑐᑦ "A Lifetime of Wisdom," ᐅᓂᒃᑳᑐᐊᕐᑐᑦ ᐅᖃᐅᓯᑦᓴᖏᓪᓗ ᒥᓂ ᑯᔦᑉ ᓵᓕ ᒍᐊᑦᓗ.
- ᑲᒪᒋᔭᐅᑦᓯᐊᕆᐊᖃᕐᓂᒧᑦ ᐱᒋᐅᕐᓴᑎᑦᓯᓃᑦ: ᐆᑦᑐᕋᕐᑕᐅᔪᖅ ᐱᓇᓱᑦᑕᐅᔪᑦᓴᖅ ᑲᒪᔩᑦ ᐱᒋᐅᕐᓴᔭᐅᓂᑦᓴᖓ ᐃᓄᒻᒪᕇᑦ ᑲᒪᒋᔭᐅᑦᓯᐊᕆᐊᖃᕐᓂᖏᓐᓅᓕᖓᔪᖅ ᖃᐅᔨᒪᔭᐅᑎᑦᓯᓂᕐᒥᓗ ᐃᓄᒻᒪᕇᑦ ᒪᑭᑕᑦᓯᐊᕆᐊᖃᕐᓂᖏᓐᓂᒃ.
- Facebook-ᑎᒍᑦ ᓇᐅᓕᒫᓂᒃ ᑐᓴᐅᒪᑎᑦᓯᒍᑎ: ᑕᕐᕿᓕᒫᒥ ᓇᐅᓕᒫᓂᒃ ᑐᓴᐅᒪᑎᑦᓯᒍᑎ ᐅᓪᓗᑕᒫᒃ ᐅᖃᐅᓯᑦᓴᑕᖃᖃᑦᑕᓗᓂ ᐱᓇᓱᐊᖃᑎᒌᒍᑎᑦᓴᓂᓪᓗ.
- ᓄᓇᓕᒻᒥ ᓵᓚᖃᕋᓱᐊᖃᑕᐅᓂᖅ: ᖃᕆᑕᐅᔭᒥᑦ ᐱᒍᓐᓇᑕᓯ ᐊᑑᑎᔭᐅᖃᑦᑕᓛᕐᑐᓄᑦ ᐅᓪᓗᖁᑎ ᑐᓴᐅᒪᑎᑦᓯᖃᑦᑕᓗᓯᓗ ᐃᓚᐅᓂᑦᓯᓂᒃ ᖃᕆᑕᐅᔭᒃᑯᑦ ᑐᓴᐅᒪᑎᑦᓯᒍᑎᑎᒍᑦ ᐱᑐᖃᑎᒋᓗᒋᑦ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᓵᓚᖃᐅᑎᑖᑐᐃᓐᓇᕆᐊᖃᕐᓗᑎᑦ, ᓵᓚᖃᐅᑎᐅᓛᕐᒥᑎᓪᓗᒍ iPad.
- ᐊᑭᓐᓇᒥᐅᑌᑦ: ᐃᓄᒻᒪᕇᑦ ᐅᓪᓗᖁᑎᖓᓅᓕᖓᔪᑦ ᐊᑭᓐᓇᒥᐅᑌᑦ ᓄᐃᑕᑎᑕᐅᖃᑦᑕᓛᕐᑐᑦ ᓄᓇᓕᓐᓂ ᓱᖃᑦᓯᕕᓐᓂ, ᐃᓕᓴᕐᕕᓂ, ᐋᓐᓂᐊᕕᓐᓂᓗ.
- ᓈᓚᐅᑎᒃᑰᓃᑦ: ᑐᓵᒐᓱᐊᖃᑦᑕᓗᓯ ᓇᐅᓕᒫᓂᒃ ᑐᓴᐅᒪᑎᑦᓯᒍᑎᑦᑎᓂᒃ ᑐᓴᐅᑎᒃᑯᑦ ᓰᐲᓰᒃᑯᓗ.
ᐃᓚᐅᖃᑦᑕᓗᓯ:
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐃᓘᓐᓀᓂᒃ ᐃᓚᐅᑦᓯᐊᖁᔨᕗᑦ ᓄᓇᕕᒻᒥ ᐃᓄᒻᒪᕇᑦ ᐅᓪᓗᖁᑎᖓᓂ ᓄᓇᓕᒻᒥ ᓵᓚᖃᐅᑎᑖᕋᓱᐊᓛᕐᑐᓄᑦ ᖃᕆᑕᐅᔭᕐᒥᑦ ᐱᓗᒋᑦ ᓱᒐᑦᓴᖃᕐᑎᓯᓂᕐᒧᑦ ᐅᓪᓗᖁᑎᒥᒃ ᖃᕆᑕᐅᔭᒃᑯᑦ ᑐᓴᕋᑦᓴᖃᕐᕕᑎᓐᓂᑦ ᐃᓚᐅᑦᓯᐊᓗᓯᓗ ᐅᒃᑑᐸᓕᒫᒥ 2024-ᒥ. ᐃᓚᐅᖁᔨᖃᑦᑕᓂᐊᕐᖁᓯ - ᐃᓚᓐᓈᓯᓐᓂᒃ, ᐃᓚᑦᓯᓂᒃ, ᐱᓇᓱᖃᑎᑦᓯᓂᓪᓗ - ᖁᕕᐊᓲᑎᖃᕐᑎᓗᑕ ᐃᓄᒻᒪᕆᖁᑎᑦᑎᓂᒃ.
ᐊᖑᒻᒪᑦᓯᒋᐊᖃᑦᑕᓗᓯ ᐱᓇᓱᐊᕐᑕᑎᓐᓂᒃ Facebook-ᑎᒍᑦ ᖃᕆᑕᐅᔭᒃᑯᓗ ᑐᓴᕋᑦᓴᖃᕐᕕᑎᓐᓂᒃ ᑐᑭᓯᒋᐊᑦᓯᐊᕕᒋᓗᒋᑦ ᐊᑑᑎᖃᑦᑕᓛᕐᑐᓂᒃ ᖃᓄᕐᓗ ᐃᓚᐅᒍᓐᓇᒪᖔᕐᐱᑦ ᖃᐅᔨᒋᐊᕕᒋᓗᒋᑦ.