ᓄᓇᕕᒻᒥ ᐃᓗᓯᓕᕆᔨᒃᑯᑦ ᑲᑎᒪᔨᖏᑦ ᑐᖕᖓᕕᖃᕐᐳᑦ ᑲᑎᒪᔨᒥᓂᒃ ᑕᓯᐅᕐᑎᒋᑦᓱᒋᑦ, ᑐᑭᑖᕐᑐᐃᔨᖏᑦᓱᒋᑦ ᑮᓇᐅᔦᓪᓗ ᑐᕌᕋᖏᓐᓂᒃ ᐊᖏᕐᑎᒋᑦᓱᒋᑦ. ᐊᕐᕌᒍᐃᑦ ᐱᖓᓱᑕᒫᑦ, ᐊᑕᐅᓯᖅ ᑲᑎᒪᔨ ᑭᒡᒐᑐᕋᔭᕐᑐᖅ ᓄᓇᓕᒻᒥᒃ ᑎᒃᑯᐊᑕᐅᓂᖃᓲᖅ ᓂᕈᐊᓂᖃᕐᑎᓗᒋᑦ ᑲᕙᒫᐱᒃᑯᑦ. ᐅᓇᒻᒥᓱᓐᓂᓂᒃ ᖃᐅᔨᑎᒃᑭᑦ ᑲᕙᒫᐱᒃᑯᑦ ᓄᐃᑦᓯᕕᒋᓗᒋᑦ ᑲᑎᒪᔨᖕᖑᕈᒪᒐᔭᕐᓂᓂᒃ ᓄᓇᓕᒻᒥ ᓂᕈᐊᓕᕐᐸᑕ.
ᐱᕕᖃᓕᕐᖁᑎᑦ ᓱᕐᕃᖃᑎᐅᒍᓐᓇᓂᕐᒥᒃ. ᐱᔭᕆᐊᑐᔫᔪᕆᒐᓗᐊᕈᕕᐅᒃ ᐱᔭᕆᐊᑐᔫᖕᖏᑐᖅ ᐃᓕᓐᓂᐊᑎᑕᐅᓂᖄᓲᖑᑦᓱᑎᓪᓗ ᑲᑎᒪᔨᖕᖑᑐᑦ. ᓄᑖᑦ ᓂᐲᑦ, ᓄᑖᑦ ᑕᑯᓐᓇᕈᓰᑦ ᓄᑖᓪᓗ ᐃᓱᒪᒍᓰᑦ ᑭᖕᖒᒪᓇᕐᐳᑦ ᓄᓇᕕᒻᒥ.
ᓯᕗᓕᕆᑦ, ᑲᔪᖏᕐᓭᒋᑦ, ᐊᓯᑦᔨᑎᕆᒋᑦ: ᓯᕗᓂᑦᓴᐅᔪᕆᔭᑎᓐᓂᒃ ᑐᓂᓯᒋᑦ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᐱᒍᑦᔨᒍᑎᐅᔪᓄᑦ!
ᓱᓇᓱᐊᕋᔭᕐᖁᖓ ᑲᑎᒪᔨᐅᓕᕈᒪ?
- ᑭᒡᒐᑐᕐᓗᑎᑦ ᓄᓇᕕᒻᒥᐅᓂᒃ:ᐅᖄᒍᑦᔨᖃᑦᑕᓗᒍ ᓄᓇᓖᑦ ᓂᕈᐊᕈᑎᖃᖃᑦᑕᓗᑎᓪᓗ ᐱᒻᒪᕆᐅᔪᓂᒃ ᐃᓗᓯᓕᕆᓂᕐᒥᒃ ᐱᓇᓱᐊᕐᑕᐅᔪᓂᒃ.
- ᐱᒻᒪᕆᓐᓂᒃ ᑐᑭᑖᕈᑎᖃᖃᑦᑕᓗᑎᑦ:ᓂᕈᐊᕈᑎᑎᑦ ᐃᓂᓪᓚᑎᕆᒍᑎᐅᖃᑦᑕᓂᐊᕐᑐᑦ ᓯᕗᓂᕐᒥ ᐱᑦᔪᔨᒍᑎᐅᒐᔭᕐᑐᓂᒃ ᐃᓗᓯᓕᕆᕕᖏᓐᓂ ᓄᓇᕕᐅᑉ.
- ᐱᓇᓱᐊᕐᓂᓄᑦ ᐊᑭᓕᕐᑕᐅᖃᑦᑕᓗᑎᑦ:$550-ᓂᒃ ᐅᓪᓗᖅ ᑮᓇᐅᔭᕐᑕᖃᑦᑕᓗᑎᑦ ᑲᑎᒪᔪᓂᓕᕈᕕᑦ, ᓂᕆᒍᑎᑎᓪᓗ ᐊᑭᓕᕐᑕᐅᓗᑎᒃ.
ᐊᑕᐅᓯᖅ ᓄᓇᓕᒃ, ᐊᑕᐅᓯᖅ ᓂᐱᒃ
ᐊᑐᓂ ᓄᓇᓖᑦ ᓄᓇᕕᒻᒥ ᑭᒡᒐᑐᕐᑎᖃᓲᑦ ᑲᑎᒪᔨᒥᒃ, ᓄᓇᓕᓕᒫᑦ ᓂᐱᒋᒍᒪᔭᖏᑦ ᑐᓴᕐᑕᐅᒍᓐᓇᖁᓪᓗᒋᑦ. ᐱᕕᖃᓕᕐᖁᑎᑦ ᑭᒡᒐᑐᕈᓐᓇᓂᕐᒥᒃ ᓄᓇᓕᓐᓂᒃ ᐊᑯᓃᕐᑐᒨᓕᖓᔪᓂᓪᓗ ᓱᕐᕃᖃᑎᐅᒍᓐᓇᓗᑎᑦ.
ᐃᓱᒫᓘᑎᖃᕐᐲᑦ ᐱᓕᓂᐅᔪᕆᖕᖏᒋᐊᖅ?
ᐃᓱᒫᓗᓐᓇᖏᑦᑐᖅ. ᑌᒣᓗᓕᓂᐅᒐᓗᐊᕈᕕᑦ ᐅᕝᕙᓗᓐᓃᑦ ᐃᓚᐅᒋᐅᕈᕕᑦ, ᑐᖕᖓᓱᑦᑎᓯᕗᒍᑦ ᐃᓕᓐᓂᒃ. ᐃᓕᓐᓂᐊᑎᑕᐅᓂᖃᑦᓯᐊᓲᑦ ᖃᑎᒪᔨᖕᖑᑐᑦ, ᐊᑐᐃᓐᓇᐅᓯᐊᖃᑦᑕᓂᐊᕋᕕᑦ ᐃᓚᐅᒍᓐᓇᓯᐊᕐᓗᑎᑦ ᐱᔭᖃᕈᓐᓇᓯᐊᕐᓗᑎᓪᓗ.
ᐅᓇᒻᒥᓱᑉᐲᑦ? ᓱᒋᐊᖃᕐᖁᖔ?
ᖃᐅᔨᑎᓗᒍ ᓄᓇᓕᑦᓯᓂ ᑲᕙᒫᐱᒃᑯᑦ ᐊᓪᓚᑎ ᑮᓇᐅᔭᓕᕆᔨᖓ. ᑭᓇᐅᒻᒪᖔᑦ ᖃᐅᔨᒪᖕᖏᑯᕕᑦ ᖃᐅᔨᒋᐊᕈᓐᓇᑐᑎᑦ ᐅᕙᓂ ᐊᓪᓚᑕᐅᓯᒪᒻᒪᑕ: https://www.krg.ca/en-CA/assets/nv-contact-list.pdf
ᑭᓇ ᐃᓚᐅᒐᓱᐊᕈᓐᓇᖃ?
ᑲᑎᒪᔨᖕᖑᕈᓐᓇᑐᑎᑦ, ᐅᑯᐊ ᒪᓕᒉᑦ ᐃᑉᐱᒋᓗᒋᑦ:
- 18-ᓂᒃ ᐅᑭᐅᖃᕐᓗᑎᑦ ᐊᖓᔪᑦᓯᐅᓗᑎᓪᓘᓃᑦ
- ᐃᒻᒥᓂᕿᒍᓐᓇᓯᐊᕐᓗᑎᑦ ᐊᓯᓐᓂᒃ ᑲᒪᒋᔨᖃᕆᐊᑐᖕᖏᓗᑎᑦ
- ᑕᓪᓕᒪᓂ ᐊᕐᕌᒍᓂ ᐊᓂᒍᕐᑐᓂ ᐱᖁᔭᓂᒃ ᓯᖁᑦᑎᕆᓯᒪᒍᓐᓀᓗᑎᑦ ᑎᒍᔭᐅᒪᒍᑎᐅᒍᓐᓇᑐᓂᒃ ᐱᖓᓱᓄᑦ ᐊᕐᕌᒍᓄᑦ ᐅᖓᑖᓄᓪᓘᓂᑦ.
- ᑲᕙᒪᒃᑯᓄᑦ ᐲᕐᑕᐅᓯᒪᒍᓐᓀᓗᑎᑦ ᑲᑎᒪᔨᐅᓂᕐᒥᑦ ᐊᕐᕌᒍᓂ ᐱᖓᓱᓂ ᐊᓂᒍᕐᑐᓂ
- ᐸᓯᔭᐅᒍᑎᖃᕐᓯᒪᒍᓐᓀᓗᑎᑦ ᑯᐯᒃᑯᑦ ᐃᓗᓯᓕᕆᓂᕐᒥᒃ ᐱᖁᔭᖏᓐᓂᒃ ᓯᖁᑦᑎᕆᓯᒪᓂᕐᒧᑦ ᐊᕐᕌᒍᓂ ᐱᖓᓱᓂ ᐊᓂᒍᕐᑐᓂ.