ᐅᖄᒍᑎᓂᐊᕈᑉ ᒥᑦᓵᓄᑦ
ᔫᓂ 2-ᒥᑦ 4-ᒧᑦ, 2026-ᒥ, ᒪᓐᑐᔨᐊᒦᑦᓱᑎᒃ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐋᕐᕿᓱᐃᓚᐅᔪᕗᑦ "ᓄᓇᕕᒻᒥ ᐃᓄᑐᙯᑦ ᐅᖄᒍᑎᖓ: ᐱᓇᓱᐊᖃᑎᒌᓪᓗᑕ ᐃᓄᑐᖏᑦ ᖃᓄᐃᖕᖏᓯᐊᖁᓗᒋᑦ," ᓄᓇᓕᓕᒫᓂ ᑲᑎᒪᓂᐊᕈᓯᖅ ᑐᕌᒐᓕᒃ ᓲᖑᓰᒋᐊᕐᓂᒥᒃ ᐱᓇᓱᐊᖃᑎᒌᓐᓂᒥᒃ ᐱᑦᔪᑎᒋᓗᒋᑦ ᖃᓄᐃᖕᖏᓯᐊᕐᓂᖏᑦ ᐊᑦᑕ.
ᐃᓚᐅᔪᑦ
85-ᒐᓛᑐᐃᓐᓇᕆᐊᓖᑦ ᐃᓚᐅᔪᑦ, ᐃᓄᑐᙯᑦ, ᓄᓇᓕᓐᓂ ᑎᒥᐅᔪᑦ, ᐃᓗᓯᓕᕆᓂᕐᒧᑦ ᐱᒍᑦᔨᕕᓐᓂ, ᓄᓇᓕᓕᒫᓂ ᐋᓐᓂᐊᕖᑦ, ᑲᕙᒫᐱᒃᑯᓗ, ᐱᓇᓱᖃᑎᒌᑦᓯᐊᑐᑦ ᖁᕝᕙᑎᑦᓯᒐᓱᐊᕈᑎᖏᓐᓂ ᖃᓄᐃᖕᖏᓯᐊᕐᓂᖏᓐᓂ ᐃᓄᑐᙯᑦ ᓄᓇᕕᓕᒫᒥ.
ᐱᖓᓱᑦ ᑐᖕᖓᕕᒋᔭᐅᓚᐅᔪᑦ ᐊᒻᒫᓯᒪᔪᑦ
ᐅᖄᒍᑎᓕᐊᖑᔪᕕᓃᑦ ᑐᖕᖓᕕᖃᕐᓱᑎᒃ ᐱᖓᓱᓂᒃ ᑐᖕᖓᕕᓪᓚᕆᐅᔪᓂᒃ ᐱᑐᑦᓯᒪᑎᓗᒋᑦ ᐊᑑᑎᓪᓚᕆᑉᐸᓂᖏᓐᓄᑦ ᐃᓄᑐᙯᑦ ᐊᒻᒪᓗ ᑲᒪᔨᐅᔪᑦ ᓄᓇᕕᒻᒥ:
- ᐃᓄᒻᒪᕇᑦ ᐊᑦᑕᓀᑦᑐᒦᒋᐊᖃᕐᓂᖓ
ᐃᓚᐅᔪᑦ ᐅᖄᒍᑎᖃᖃᑦᑕᑎᓪᓗᒋᑦ ᒪᑭᑕᑦᓯᐊᕆᐊᖃᕐᓂᖏᓐᓂᒃ, ᓲᓱᒋᔭᐅᒋᐊᖃᕐᓂᖏᓐᓂᒃ, ᐊᑦᑕᓀᑦᑐᒦᒋᐊᖃᕐᓂᖏᓐᓂᓗ ᐃᓄᒻᒪᕇᑦ, ᐃᓚᖃᕐᑎᓗᒋᑦ ᑲᒪᒋᔭᐅᑦᓯᐊᕆᐊᖃᕐᓂᖏᓐᓂᒃ, ᐊᑐᐃᓐᓇᖃᕆᐊᖃᕐᓂᒥᓪᓗ ᑐᑭᓯᒪᐅᑎᑦᓴᓂᒃ ᐃᑲᔪᕐᑕᐅᕕᑦᓴᓂᓪᓗ, ᓲᖑᓯᑎᑦᓯᒋᐊᕈᑎᑦᓴᓂᓪᓗ ᓄᓇᓕᒻᒥ ᐃᑲᔪᕐᑕᐅᕕᓐᓂᒃ ᓴᐳᑦᔭᐅᒋᐊᖃᕐᓂᖏᓐᓂᓗ ᐃᓄᑐᙯᑦ ᐃᓄᒻᒪᕇᓪᓗ ᐊᑦᑕᓇᕐᑐᒨᑐᐃᓐᓇᕆᐊᓖᑦ.
- ᓄᓇᓕᒻᒥ ᐱᒍᑦᔭᐅᕖᑦ ᐃᑲᔪᕐᑎᓭᓪᓗ
ᐅᖄᒍᑎᖃᖃᑦᑕᓗᑎᓪᓗ ᐱᒍᑦᔨᐅᑎᓂᒃ ᐱᒋᐊᕐᑎᑕᐅᓯᒪᔪᓂᓪᓗ ᐃᓄᒻᒪᕇᑦ ᒪᑭᑕᑦᓯᐊᕈᑎᑦᓴᖏᓐᓅᓕᖓᔪᓂᒃ, ᐃᓚᖃᕐᑎᓗᒋᑦ ᖃᓄᐃᖕᖏᓯᐊᕆᐊᖃᕐᓂᒧᑦ ᐱᒍᑦᔨᐅᑏᑦ, ᐊᓇᕐᕋᒥ ᑲᒪᒋᔭᐅᓃᑦ, ᑲᒪᔨᖏᑦᑕ ᓴᐳᒻᒥᔭᐅᒋᐊᖃᕐᓂᖏᑦ, ᐃᓄᐃᑦ ᐃᓕᕐᖁᓯᖓᑎᒍᑦ ᐃᑲᔪᕐᓯᔭᐅᒍᑏᑦ, ᓄᓇᓕᒻᒥ ᓱᒐᑦᓴᖃᕐᑎᑕᐅᒍᑏᑦ, ᐱᕕᑦᓭᓗ ᐃᑲᔪᕐᓯᒍᓐᓇᑐᑦ ᐃᓄᒻᒪᕇᑦ ᑌᒣᓕᖓᑐᐃᓐᓇᑌᓕᒍᑎᑦᓴᖏᓐᓂᒃ, ᐱᑐᑦᓯᒪᖃᑕᐅᑦᓯᐊᕆᐊᖃᕐᓂᖏᓐᓂᒃ, ᓴᐳᑦᔭᐅᒋᐊᖃᕐᓂᖏᓐᓂᓗ ᓄᓇᓕᒥᓂ.
- ᐃᓪᓗᓕᕆᓂᖅ, ᐊᕙᑎᓕᕆᓂᖅ, ᐊᑦᑕᓀᑦᑐᓯᐊᒍᑎᓪᓗᒋᓪᓗ ᐃᓂᑦᓴᖃᕐᑎᑕᐅᒍᑎᖏᑦ
ᑕᒪᓐᓇ ᕿᒥᕐᕈᓂᐅᒐᔭᕐᑐᖅ ᐱᓪᓚᕆᐅᓂᖓᓂᒃ ᐊᑦᑕᓀᑦᑐᓯᐊᒥᒃ, ᐊᑐᐃᓐᓇᐅᑎᑕᐅᑦᓯᐊᑐᒥᒃ, ᐃᓄᐃᑦ ᐃᓕᕐᖁᓯᖓᓅᓕᖓᑦᓯᐊᑐᒥᒃ ᐊᓇᕐᕋᖃᕐᑎᑕᐅᒋᐊᖃᕐᓂᖓᓂᒃ ᐃᓄᒻᒪᕇᑦ, ᐃᓚᖃᕐᑎᓗᒍ ᐃᓪᓗᖃᕐᓂᒧᑦ ᐊᑑᑎᔭᐅᓪᓚᕆᑦᑐᑦ, ᐃᓄᓐᓅᓕᖓᑎᑕᐅᑦᓯᐊᕆᐊᖃᕐᓂᖓ ᐃᓂᑦᓭᑦ, ᐊᑐᐃᓐᓇᐅᑎᑕᐅᒋᐊᖃᕐᓂᖏᓐᓂᓗ, ᓇᔪᕐᑕᖏᓐᓃᑐᐃᓪᓗ ᖃᓄᐃᖕᖏᓯᐊᕐᕕᓴᐅᒍᓐᓇᑐᑦ ᐃᓄᒻᒪᕆᖕᖑᐸᓪᓕᐊᔪᓄᑦ ᓄᓇᕕᒻᒥ ᓄᓇᓕᓐᓂ.
ᑐᕌᒐᖏᑦ
ᐱᓂᐊᕐᓂᖃᕈᑎᒥᒃ ᑐᕌᕋᖃᕐᓯᒪᑦᔭᖏᑦᑐᖅ, ᐅᖄᖃᑎᒌᓐᓂᖅ ᑐᕌᕐᓂᖃᕐᓯᒪᔪᖅ ᐃᑲᔪᕐᓯᓗᑎᑦ ᓄᐃᑦᓯᓂᕐᒧᑦ ᐊᑯᓂᐅᔪᒥᒃ ᐱᕙᓪᓕᐊᓚᖀᓂᕐᒥᒃ ᓲᖑᓰᒋᐊᕆᓗᑎᓗ ᓄᓇᓕᓕᒫᓂ ᐱᓇᓱᖃᑎᒌᓐᓂᒥᒃ ᐃᓄᑐᙯᑦ ᖃᓄᐃᖕᖏᓯᐊᕆᐊᖃᕐᓂᖏᓐᓄᑦ ᓄᓇᕕᒻᒥ.
- ᐱᒍᑦᔨᐅᑏᑦ ᐃᓄᒻᒪᕆᓐᓂᒃ ᓲᖑᓯᑎᒋᐊᕈᒪᒧᑦ ᐊᑕᐅᓯᐅᓕᖓᑎᒋᐊᕐᓗᒋᓪᓗ
- ᐃᓕᒃᑰᑎᕈᑕᐅᖕᖏᓂᕐᓴᐅᓂᐊᕐᑎᓗᒍ ᐊᑕᐅᑦᓯᑰᕐᑎᓯᒋᐊᖃᕐᓂᖅ ᐱᓇᓱᖃᑎᒌᑦᑐᓄᑦ
- ᑐᓂᒪᐅᑎᖃᑦᓯᐊᓂᖅ ᐃᓘᓐᓀᓄᑦ ᐃᑉᐱᒋᔭᐅᓂᖃᑦᓯᐊᑐᒥᒃ
- ᐊᑐᐃᓐᓇᕈᕐᑎᕆᓂᖅ ᑲᔪᓯᑎᑕᐅᓂᑦᓴᖓᓂᒃ ᓄᓇᓕᓕᒫᓂ ᐃᓄᒻᒪᕇᑦ ᐊᑕᐅᑦᓯᑰᕐᑎᓯᔨᖏᑦᑕ ᑲᑎᒪᓂᑦᓴᖓᓂᒃ
ᑕᒪᒃᑯᐊ ᐊᑑᑎᔭᐅᓛᕐᒥᑎᓪᓗᒋᑦ, ᐅᖄᖃᑎᒌᓐᓂᖅ ᐃᑲᔪᕐᓯᒍᑎᑦᓴᓕᐊᒍᓯᒪᕗᖅ ᐊᑯᓂᕐᑐᒧᑦ ᐊᐅᓚᔨᒐᑦᓴᐅᓛᕐᓂᖓᓂᒃ ᓄᓇᓕᓕᒫᓂᓪᓗ ᑲᑐᑦᔨᒍᑕᐅᑦᓯᐊᕆᐊᓪᓚᒋᐊᖃᕐᓂᖓᓂᒃ ᐃᓄᒻᒪᕇᑦ ᒪᑭᑕᑦᓯᐊᕆᐊᖃᕐᓂᖓ ᑲᒪᔨᖏᑦᑕᓗ ᐃᑲᔪᕐᓯᔭᐅᖃᑦᑕᕆᐊᖃᕐᓂᖏᑦᑕ ᓄᓇᕕᒻᒥ.
ᐅᖄᖃᑎᒌᓐᓂᖅ ᐃᒣᓕᖓᒐᔭᕐᑐᖅ
ᐅᓪᓗᓂ ᐱᖓᓱᓂ, ᐃᓚᐅᔪᑦ ᐅᖄᔪᓃᖃᑦᑕᕈᓐᓇᓛᕐᑐᑦ, ᐅᓂᒃᑳᓯᐅᖃᑎᒌᑦᑐᓄᓪᓗ ᐃᓚᐅᒍᓐᓇᓗᑎᒃ, ᑲᑎᒪᓂᐊᕈᓯᓕᐊᖃᑦᑕᓗᑎᒃ, ᒪᒥᓴᖃᑎᒌᑦᑐᓕᐊᖃᑦᑕᓗᑎᒃ, ᓱᒐᑦᓴᖃᕐᑎᓯᔪᓕᐊᖃᑦᑕᓗᑎᓪᓗ ᐅᖄᖃᑎᒌᑦᑐᓄᑦ ᓄᓇᕐᖃᑎᒌᖕᖏᑐᓄᑦ ᐱᓇᓱᖃᑎᒌᕝᕕᓂᓪᓗ ᐱᓯᒪᔪᓄᑦ.
ᑕᒪᓐᓇ ᐱᕕᑦᓴᖃᕐᑎᓯᓂᐅᓛᕐᑐᖅ ᑐᓴᕐᑎᓯᖃᑎᒌᒍᓐᓇᓂᕐᒥᒃ ᐊᑑᑎᖃᑦᑕᓯᒪᔭᒥᓂᒃ, ᓇᓗᓀᕐᓯᒍᓐᓇᓂᕐᒥᒃ ᓯᕗᓪᓕᐅᔨᒐᑦᓴᓂᒃ, ᐅᖄᒍᑎᖃᕐᓂᒥᒃ ᐱᔭᕆᐊᑐᒃᑑᕈᑕᐅᓯᒪᔪᓂᒃ, ᐱᒋᐊᕐᑎᑕᐅᑦᓯᐊᓯᒪᔪᓂᒃ ᐅᓂᒃᑳᕈᑎᖃᕐᓂᖅ, ᐱᓇᓱᖃᑎᒌᑦᓯᐊᐸᓪᓕᐊᒋᐊᖃᕐᓂᒥᓪᓗ ᓄᓇᕕᓕᒫᒥ. ᑲᑐᑦᔨᖃᑎᒌᓐᓂᐅᓱᓂ ᓄᓇᓕᒻᒨᓕᖓᑦᓱᓂᓗ, ᐃᓚᕕᐅᑦᓯᐊᖃᑦᑕᓗᓂ, ᓈᓚᓐᓂᑕᖃᑦᓯᐊᓗᓂᓗ ᐃᓘᓐᓇᑎᓪᓗ ᑕᑯᒋᐊᖃᑎᒌᒍᓐᓇᓗᑎᒃ.
ᓄᐃᑦᓴᒪᕆᑐᖅ
ᑐᑭᓯᒋᐊᕈᑎᑦᓴᖃᕆᐊᓪᓚᓛᕐᑐᖅ, ᐃᓚᖃᕐᓗᓂ ᓱᓇᒥᑦᓯᔫᑉᐸᐅᔮᓗᒻᒧᑦ ᑐᓴᕐᑎᓯᒍᑎᒥᒃ ᐊᒻᒪᓗ ᑕᑯᓐᓇᑕᐅᒍᓐᓇᑐᓂᒃ ᐳᐃᒍᕐᑌᓕᒍᑎᓂᒃ ᐱᓂᐊᕐᓂᐅᔪᒥᒃ, ᐃᓘᓐᓀᓄᓪᓗ ᐃᓘᓐᓈᒍᑦ ᐅᖃᐅᑏᑦ ᐊᕗᖓᐅᓕᖓᓂᒃ ᐱᓇᓱᐊᕐᑕᐅᒋᐊᓪᓚᓚᖓᔪᓂᒃ.
ᑲᑎᖃᑎᒌᑦᑐᑦ ᒪᑭᑕᑦᓯᐊᕆᐊᖃᕐᓂᖏᓐᓄᑦ ᐃᓄᒻᒪᕇᑦ