ᑐᑭᖏᑦ
ᓂᕿᖃᑦᓯᐊᓂᖅ ᓄᐃᑕᓯᓲᖑᕗᖅ ᑕᒪᒃᑯᐊ ᐊᓂᕐᑎᕆᔪᓕᒫᑦ ᑌᒪᖓᓕᒫᖅ ᐱᕕᖃᕈᓐᓇᑐᐊᕐᒪᑕ ᒪᑭᑕᒍᑎᖃᕈᓐᓇᑐᐊᕐᒪᑕᓗ ᓇᒻᒪᓯᐊᕐᑐᓄᑦ ᓂᕿᑦᓯᐊᓄᑦ ᓄᒃᑭᓴᕐᓇᓯᐊᕐᑐᓄᑦ ᐃᓅᓯᖃᑦᓯᐊᕈᑕᐅᒍᓐᓇᑐᓂᒃ ᖃᓄᐃᖏᓯᐊᕐᓂᑎᒍᑦ ᓱᓇᓱᐊᑦᓯᐊᓂᒃᑯᓗ.
ᓂᕿᖃᑦᓯᐊᖏᑦᑑᓂᖅ ᓄᐃᑕᓲᖑᕗᖅ ᐃᓄᑑᓈᕐᑎᑐᒥᒃ ᐃᓚᒌᓂᓪᓘᓃᑦ ᓇᒻᒪᓯᐊᑐᓄᑦ ᓂᕿᑖᕐᕕᓴᖃᕈᓐᓀᑐᐊᕐᒪᑕ.
ᓄᓇᕕᒻᒥᐅᑎᒍᑦ, ᐃᓱᒪᒋᔭᐅᑦᓯᐊᕆᐊᓕᒃ ᐱᕕᖃᕈᓐᓇᑐᖃᑐᐊᕋᒥ ᑕᒪᖏᓐᓂᒃ ᓂᕿᑐᐃᓐᓇᓂᓪᓗ ᐊᒻᒪᓗ ᖃᓄᐃᖏᓯᐊᕐᑐᓂᒃ ᓂᐅᕕᕐᕕᒥ ᓂᐅᕕᕐᑕᐅᓂᑯᕐᓂᒃ ᓂᕿᖏᓐᓂᒃ ᐱᐅᓯᓕᐅᒥᑎᑦᓯᓯᒪᖏᐊᖓᓂᒃ ᓂᕿᖃᑦᓯᐊᓂᕐᒥᒃ.
ᓂᕿᖃᑦᓯᐊᓂᐅᑉ ᒥᑦᓵᓄᑦ ᑐᑭᓯᒋᐊᕈᒪᔪᖃᕐᐸᑦ ᐅᕙᓂ ᑕᑯᒋᐊᕐᑕᐅᒍᓐᓇᑐᖅ:
ᓂᕿᖃᑦᓯᐊᖏᓐᓂᒧᑦ ᓄᓇᕕᒻᒥ
ᐊᒥᓱᒻᒪᕆᓐᓂᒃ ᐃᓚᒌᖑᔪᓂᒃ ᓄᓇᕕᒻᒥ ᓂᕿᑖᕐᑐᖃᑦᓯᐊᖏᑦᑑᔪᖃᓲᖑᕗᖅ. ᑭᖑᓪᓕᐹᖓᓂ ᓄᓇᓕᓕᒫᑦ ᖃᓄᐃᖏᓯᐊᕐᓂᒧᑦ ᖃᐅᔨᓴᕐᑕᐅᓂᖃᕐᑎᓗᒋᑦ 2004-ᒥ, ᓴᓂᐊᓃᑦᑐᒥᒃ ᐊᑕᐅᓯᕐᒧᑦ ᑖᒃᑯᐊ 4-ᖑᔪᐃᑦ ᐊᑯᓐᓂᖏᓐᓂ ᑐᓴᕐᑎᓯᔪᖃᓚᐅᔪᕗᖅ ᓂᕿᖃᑦᓯᐊᖏᑦᑑᓯᒪᓚᐅᕆᐊᒥᒃ ᑕᕐᕿᐅᓚᐅᕐᑐᒥ ᖃᐅᔨᓴᕐᓂᖃᓚᐅᕐᑎᓇᒍ. ᐊᒥᓱᒐᓚᓐᓂᒃ ᐱᑦᔪᑎᖃᕐᓱᑎᒃ ᐃᓚᖃᕐᑐᓂᒃ ᒪᑯᓂᖓ:
- ᓂᕿᓂᒃ ᓂᐅᕕᐊᑦᓴᖃᓲᑦ ᐊᑭᑐᔫᓂᑯᖏᓐᓄᑦ;
- ᐊᑭᑐᔫᓂᑯᖏᓐᓄᑦ ᒪᙯᒍᑏᑦ ᐅᕐᓱᐊᓗᓪᓗ ᐆᒪᔪᕐᓯᐅᕈᒪᔪᖃᓕᕐᒪᑦ;
- ᐊᔪᕐᓴᓲᖑᒧᓪᓘᓃᑦ
- ᐆᒪᔪᐃᑦ ᐃᓚᖏᑦ ᐃᑭᓪᓕᓕᐅᒥᓯᒪᓂᖏᓐᓄᑦ;
- ᓯᓚᐅᑉ ᐊᓯᑦᔨᕙᓪᓕᐊᓂᖓᓄᑦ;
- ᐱᕕᑦᓴᖃᑦᓯᐊᖏᑦᑑᓂᕐᒥᓄᑦ ᖃᐅᔨᑎᑦᓯᓂᕐᒥᒃ ᒪᙯᒍᓯᕐᓂᒃ ᐃᖃᓗᓐᓂᐊᒍᓯᕐᓂᓗ ᑎᒍᓚᒍᓯᕐᓂᓗ;
- ᖃᐅᔨᒪᑦᓯᐊᖏᑦᑑᒧᑦ ᓂᐅᕕᕐᕕᒥᐅᔦᑦ ᓂᖀᑦ ᖃᓄᖅ ᐊᑐᐃᓐᓇᕈᕐᑎᑕᐅᓲᖑᒻᒪᖔᑕ;
- ᐊᑐᐃᓐᓇᐅᖏᓐᓂᓴᐅᓂᖏᑦ ᓂᖀᑦ ᓂᐅᕕᕐᓂᐊᕕᓐᓂ ᐃᓚᖏᓐᓂ ᓄᓇᓕᓐᓂ.
ᐃᓄᐃᑦ ᑮᓇᐅᑦᔭᓴᑦᓯᐊᖏᑦᑐᑦ, ᐱᓇᓱᒐᖃᖕᖏᑐᑦ ᐊᒻᒪᓗ ᐃᓄᑑᑦᔨᓱᑎᑦ ᐱᕈᕐᓭᔪᑦ ᕿᑐᕐᖓᒥᓂᑦ ᓂᖀᓪᓕᐅᓂᕐᓴᐅᑐᐃᓐᓇᕆᐊᖃᕐᖁᑦ. ᐊᒥᓲᑦᓱᑎᑦ ᐃᓚᒌᖑᔪᑦᑦ ᓂᕿᖃᑦᓯᐊᖏᑦᑑᓲᖑᒻᒥᔪᑦ.
ᓂᕿᐅᑉ ᐊᑭᖏᑦ ᐳᕐᑐᓂᕐᓭᑦ 81% ᐳᓴᓐᑎᓄᑦ ᑕᒫᖕᖓᑦ ᑯᐯᒃ ᓯᑎᒥᑦ (Duhaime & Caron (2012). ᓄᓇᕕᒻᒥ ᐊᑭᒋᔭᐅᓲᓂᒃ ᕿᒥᕐᕈᒍᑏᑦ 2011)
ᓂᕿᖃᑦᓯᐊᖏᓐᓂᐅᑉ ᓱᕐᕃᒍᑎᒋᓲᖏᓐᓄᑦ ᖃᓄᐃᖏᓯᐊᕐᓂᒧᑦ
ᓂᕿᖃᑦᓯᐊᖏᓐᓂᖅ ᓱᕐᕃᒍᓐᓇᑐᖅ ᑎᒥᒋᔭᐅᔪᓂᒃ ᐃᓱᒪᒃᑯᓗ ᖃᓄᐃᖏᓯᐊᕈᑕᐅᔪᓂᒃ ᐃᓄᑑᓇᕐᑎᑐᓄᑦ, ᐃᓚᒌᓄᓪᓗ ᓄᓇᓕᓐᓄᓗ. ᑕᒪᓐᓇ ᐱᑐᑦᓯᒪᓂᖃᕐᑐᖅ ᒪᑯᓄᖓ:
- ᐊᓐᓂᐊᓚᕆᑦᑖᑐᐃᓐᓇᕆᐊᖃᓕᕐᓱᓂ, ᒪᑦᓱᒥᖓ ᐱᑕᑦᓴᖃᑦᓯᐊᖏᓐᓂᒥᒃ;
- ᐃᓕᑦᓯᓯᐊᕈᓐᓇᓂᖓ ᒥᑭᓕᐅᒥᓗᓂ;
- ᐅᖁᒣᑦᑐᑯᕐᓂᓄᑦ ᐱᐊᕋᕐᓂᑦ ᐃᓚᒌᓂᓗ;
- ᐃᓱᒪᒃᑯᑦ ᖃᓂᒪᑐᐃᓐᓇᕆᐊᓕᒃ, ᐅᑦᑑᑎᒋᓗᒍ ᐅᖁᒣᓪᓕᐅᓗᓂ.
ᓄᓇᕕᒻᒥ ᐃᓗᓯᓕᕆᔩᑦ ᑲᑎᒪᔨᖏᑦ ᓴᐳᒻᒥᓲᖑᕗᑦ ᓄᓇᓕᓐᓂᓗ ᓄᓇᓕᓕᒫᓂᓪᓗ ᓱᓇᓱᐊᕐᓂᒧᑦ ᓂᕿᖃᑦᓯᐊᓂᕐᒨᓕᖓᔪᓂᒃ
ᐱᓇᓱᐊᖃᑕᐅᑎᓪᓗᒋᑦ ᓄᓇᓕᓪᓗ ᓄᓇᓕᓕᒫᓪᓗ ᑎᒥᖁᑎᖏᑦ, ᑖᒃᑯᐊ ᐃᓗᓯᓕᕆᔨᒃᑯᑦ ᓴᐳᒻᒥᔭᖃᓲᖑᕗᑦ ᐊᑦᔨᒋᖏᑐᓂᒃ ᓄᓇᓕᓐᓂᓗ ᓄᓇᓕᓕᒫᑎᒍᓪᓗ ᓱᓇᓱᐊᕐᓂᐅᔪᕐᓄᑦ, ᐃᓚᖃᕐᑐᓂᒃ ᒪᑯᓂᖓ:
- ᓄᓇᓕᓐᓂ ᐃᒐᕕᖃᕐᑎᓯᓂᕐᒥᒃ;
- ᓱᓇᓱᐊᕐᓂᓂᒃ ᐅᖄᖃᑎᒋᓐᓂᒥᒃ ᖃᐅᔨᒪᒍᓯᕐᓂᒃ ᓂᕿᑐᐃᓐᓇᓄᑦ;
- ᐅᓪᓛᕈᒥᑕᕐᑎᓯᑦᓱᑎᒃ ᑕᒧᓗᑎᑦᓯᓱᑎᓪᓗ ᐱᐊᕋᕐᓂᒃ ᐃᓕᓐᓂᐊᑎᓂᒃ
- ᓂᕿᑎᒍᑦ ᓴᐳᒻᒥᔭᐅᔪᖃᕐᓱᓂ ᐊᕐᓇᓂᒃ ᐱᐊᕋᑦᓴᓕᓐᓂᒃ;
- ᓂᐅᕕᕐᕕᐅᑉ ᐃᓗᐊᒍᑦ ᓂᕿᖃᑦᓯᐊᑎᑦᓯᓃᑦ.
ᑐᑭᓯᒋᐊᕈᒪᔪᖃᕐᐸᑦ ᓴᐳᒻᒥᒍᑎᓄᑦ ᑮᓇᐅᔭᖃᕐᑎᓯᒍᑎᐅᒍᓐᓇᑐᓄᓪᓗ ᓄᓇᕕᒻᒥ ᐃᓗᓯᓕᕆᔨᒃᑯᓄᑦ ᓱᓇᓱᐊᕐᓂᓄᑦ ᓂᕿᖃᑦᓯᐊᑎᑦᓯᒐᓱᐊᕐᓂᒧᑦ, ᑕᑯᒋᐊᕈᓐᓇᐳᑎᑦ ᐱᒐᓱᐊᕈᑎᓂᒃ . (ᖃᓪᓗᓈᑎᑐᑦ ᑭᓯᐊᓂ)
ᓂᕿᖃᑦᓯᐊᑎᑦᓯᒐᓱᐊᕈᑏᑦ ᐃᓚᖓᑎᒍᑦ ᑮᓇᐅᔭᖃᕐᑎᑕᐅᔪᑦ ᐅᑯᓄᖓ ᑲᓇᑕᐅᑉ ᑕᕐᕋᖓᓂ ᓂᕿᖃᑦᓯᐊᑎᑦᓯᒐᓱᐊᕐᓂᒧᑦ ᐃᑲᔪᕐᓯᒪᐅᑎᓄᑦ, ᓄᓇᖃᕐᖄᓯᒪᔪᐃᑦ ᐱᑕᑦᓴᖃᑦᓯᐊᖏᓐᓂᖓᓂᒃ ᑲᒪᒍᑎᖓᓂᒃ ᐅᕙᓂ (ᖃᓪᓗᓈᑎᑐᑦ ᑭᓯᐊᓂ) , ᖃᓄᐃᖏᓯᐊᕐᓂᑯᑦ ᐃᓕᓐᓂᐊᕕᒻᒥ ᐊᑑᑎᔭᐅᒐᓱᐊᕈᑎᓂᒃ ᐊᒻᒪᓗ ᑲᓇᑕᒥ ᐱᐊᕋᑦᓴᓖᑦ ᓂᕿᖃᑦᓯᐊᓂᖏᓐᓄᑦ ᐃᑲᔪᕐᓯᒪᐅᑎᖏᓐᓂ (ᖃᓪᓗᓈᑎᑐᑦ ᑭᓯᐊᓂ).
ᑐᑭᓯᒋᐊᓪᓚᕈᒪᔪᖃᕐᐸᑦ ᓂᕿᖃᑦᓯᐊᑎᑦᓯᒐᓱᐊᕐᓂᒧᑦ ᓱᓇᓱᐊᕐᑕᐅᓯᐊᕈᓇᐅᔪᓄᑦ ᑕᑯᒋᐊᕐᓗᑎᒃ ᐅᕙᓂ:
ᓂᕿᖃᑦᓯᐊᑎᑦᓯᓂᕐᒧᑦ ᑲᓇᑕᐅᑉ ᑕᕐᕋᖓᓂᒥᐅᓂᒃ: ᓇᐅᑦᓯᑐᐃᒍᑎᓂᒃ ᖃᓄᐃᓕᖓᓕᕐᒪᖔᑕ ᖃᐅᔨᒪᔭᐅᓂᖃᕐᑐᑦ. ᐃᑦᓯᕙᔩᑦ ᖃᓄᐃᓕᖓᓕᕐᒪᖔᑕ ᖃᐅᔨᒪᔭᐅᔪᑦ ᓂᕿᖃᑦᓯᐊᕋᓱᐊᕐᓂᒧᑦ ᑲᓇᑕᐅᑉ ᑕᕐᕋᖓᓂ (ᖃᓪᓗᓈᑎᑐᑦ ᑭᓯᐊᓂ)
ᐃᓚᐅᒋᑦ ᐱᓇᓱᐊᕐᑕᐅᔪᒧᑦ ᓂᕿᖃᑦᓯᐊᑎᑦᓯᓂᕐᒥᒃ ᓄᓇᕕᒻᒥ!
ᐊᑕᐅᓯᐊᐱᒻᒥᒃ ᖃᓄᕐᑑᕈᑎᑦᓴᖃᖕᖏᓚᖅ ᐱᓀᓗᑕᐅᔪᒧᑦ ᓂᖀᓐᓂᐊᓂᕐᒧᑦ. ᐊᒥᓱᒐᓓᑦ ᓄᓇᓕᓐᓂ ᓄᓇᓕᓕᒫᓂᓗ ᑎᒥᐅᔪᑦ ᑲᑐᑦᔨᖃᑎᒌᑦᑐᐃᓗ ᐃᑲᔪᕐᓯᒍᓐᓇᖁᑦ, ᖃᓄᐃᓗᕈᑎᕐᒥᑎᒍᑦ, ᐃᑲᔪᕐᓯᓗᑎᑦ ᓂᕿᖃᑦᓯᐊᓂᕐᒥᒃ. ᑐᑭᒧᐊᑦᓯᐊᓂᐊᕐᒪᑕ ᐊᔪᐃᓐᓇᕈᑎᕗᑦ, ᓄᐃᑦᓯᒋᐊᖃᕐᖁᒍᑦ ᑖᑦᓱᒥᖓᑦᓭᓇᖅ ᑕᑯᓐᓇᐅᔮᕐᑕᕗᓐᓂᑦ ᐊᒻᒪᓗ ᑖᒃᑯᓂᖓᑦᓭᓇᖅ ᐸᕐᓀᓯᒪᒍᑎᖃᕐᓗᑕ ᐃᓚᐅᔪᑦ ᐃᓱᒫᓘᑎᓖᑦ ᐱᓀᓗᑕᒥᒃ ᐊᕐᕌᒍᓚᖓᔪᓂᑦ ᓯᕗᓂᑦᑎᓂ.
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᑐᑭᒧᐊᑦᑎᓯᕗᑦ ᖃᓄᐃᓗᕈᑎᐅᔪᒥᒃ ᓄᐃᑦᓯᒐᓱᑦᓱᑎᑦ ᓄᓇᓕᓕᒫᑎᒍᑦ ᓂᕿᖃᑦᓯᐊᕆᐊᖃᕐᓂᒧᑦ ᐱᖁᔭᒥᒃ. ᑖᓐᓇ ᐱᖁᔭᖅ ᐸᕐᓀᑕᐅᒪᓚᖓᔪᖅ ᐃᓚᐅᑎᓪᓗᒋᑦ ᓄᓇᓕᓕᒫᓂ ᑎᒥᐅᔪᑦ ᓄᓇᓖᓪᓗ ᐊᑐᐃᓐᓇᐅᓕᐅᒥᑎᑦᓯᓗᑎᑦ ᓂᕿᑦᓯᐊᓂᑦ ᓂᐅᕕᐊᑦᓴᔭᓂᑦ ᓂᕿᑐᐃᓐᓇᓂᓗ. ᐃᓚᖃᕐᓂᐊᑐᖅ ᑖᑦᓱᒥᖓᑦᓭᓇᖅ ᑕᑯᓐᓇᐅᔮᕐᑕᐅᔪᒥᒃ ᐊᒻᒪᓗ ᑖᒃᑯᓂᖓᑦᓭᓇᖅ ᑐᕌᒐᖃᕐᓗᑎᑦ ᐱᐅᓯᐅᒦᒋᐊᕐᓗᑎᑦ ᓂᕿᖃᑦᓯᐊᕆᐊᖃᕐᓂᒥᒃ ᓄᓇᕕᒻᒥ. ᐸᕐᓀᑕᐅᒪᔪᑦ ᖃᓄᐃᓘᕈᑎᑦᓭᑦ ᐋᕐᕿᑕᐅᓛᕐᖁᑦ ᑐᖕᖓᕕᐅᓂᐊᕐᓗᑎᑦ ᑐᑭᒧᐊᑦᑎᓯᒍᑎᐅᓂᐊᕐᓗᑎᑦ ᐊᔪᐃᓐᓇᕈᑎᐅᔪᓂᑦ ᒫᓐᓇᓯᐅᑎᓂᑦ, ᐊᑯᓂᒐᓛᑦᑐᒧᓕᖓᔪᓂᑦ ᐊᑯᓃᕐᑐᒧᓕᖓᔪᓂᓗ. ᓄᐃᑦᓯᓂᐊᕐᑐᑦ ᖃᓄᐃᓘᕈᑎᑦᓴᓂᑦ ᐊᑑᑎᔭᐅᒋᐊᓕᓐᓂᑦ, ᐃᓱᒪᒋᔭᖃᕐᓗᑎᑦ ᐃᑲᔪᕐᓯᒍᓐᓇᑐᓂᑦ ᐊᑐᐃᓐᓇᐅᔪᓂᑦ ᓄᓇᖁᑎᖓᓂ.
ᓄᓇᓕᓕᒫᓂ ᐱᓇᓱᖃᑎᒌᑦᑐᑦ ᐊᒥᓱᐃᖑᔪᑦ ᓂᕿᖃᑦᓯᐊᕆᐊᖃᕐᓂᒧᓕᖓᔪᓂᑦ ᓄᐃᑕᐅᓐᓂᖁᑦ 2015ᒥ ᓄᐃᑦᓯᔪᑦᓴᐅᓱᑎᑦ ᓄᓇᓕᓕᒫᓄᓕᖓᔪᓂᑦ ᓂᕿᖃᑦᓯᐊᕆᐊᖃᕐᓂᒧᑦ ᐱᖁᔭᒥᒃ. ᐱᒍᑦᔨᔪᑦ ᓄᓇᓕᓕᒫᓂ ᑎᒥᐅᔪᓂᑦ ᑲᑐᑦᔨᖃᑎᒌᑦᑐᓂᓗ ᑭᒡᒐᑐᕐᑕᐅᕗᑦ ᐊᒥᓱᐃᖑᔪᑦ, ᐃᓚᐅᑎᓪᓗᒋᑦ:
• ᒪᑭᕝᕕᒃ
• ᑲᑎᕕᒃ ᓄᓇᓕᓕᒫᑦ ᑲᕙᒪᖓ
• ᑲᑎᕕᒃ ᐃᓕᓴᕐᓂᓕᕆᓂᖅ
• ᐋᓐᓂᐊᕖᒃ
• ᓴᑐᕐᕖᑦ ᐊᕐᓀᑦ ᑲᑐᑦᔨᖃᑎᒌᑦᑐᑦ
• ᐃᓄᑐᙯᑦ ᑲᑐᑦᔨᖃᑎᒌᓐᓂᖓ
• ᐃᓚᒌᓴᖅ
• ᓄᓇᕕᒻᒥ ᖃᐅᔨᓴᕐᕕᒃ
• ᓄᓇᕕᒻᒥ ᑲᑐᑦᔨᖃᑎᒌᑦᑐᑦ ᐆᒪᔪᕐᓂᐊᑏᑦ, ᐃᖃᓪᓕᐊᑏᑦ ᒥᑭᒋᐊᕐᓂᐊᑏᓗ
• ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ
ᓯᑕᒣᑦ ᐱᒻᒪᕆᖁᑎᒋᔭᐅᔪᑦ ᐱᓀᓗᑌᑦ ᓇᓗᓀᕐᑕᐅᓂᕐᖁᑦ ᐱᓇᓱᖃᑎᒌᑦᑐᓄᑦ ᐊᒥᓱᐃᖑᔪᓄᑦ. ᑐᖕᖓᕕᐅᓂᐊᕐᑐᑦ ᓄᐃᑦᓯᒍᑎᐅᓗᑎᑦ ᓄᓇᓕᓕᒫᓂ ᓂᕿᖃᑦᓯᐊᕆᐊᖃᕐᓂᒧᑦ ᐱᖁᔭᕐᒥᒃ:
• ᓂᕿᑐᐃᓐᓇᒥᒃ ᐊᑐᐃᓐᓇᖃᕐᓂᖅ
• ᓂᕿᓯᒍᓐᓇᓂᖅ ᐊᑐᐃᓐᓇᖃᕐᓂᓗ ᓂᕿᓂᑦ ᓂᐅᕕᕐᓂᐊᕕᓐᓂ
• ᓄᐃᑕᑎᑕᐅᓗᑎᑦ ᓂᕿᑦᓯᐊᑑᒪᓃᑦ ᐃᑲᔪᕐᓯᔭᐅᓗᑎᓗ ᐃᓄᑑᓈᕐᑎᑐᑦ ᓂᕿᖃᑦᓯᐊᖏᓗᐊᖕᖑᐊᑐᑦ (ᐅᑦᑑᑎᒋᓗᒋᑦ, ᓂᕆᓐᓇᓂ ᐊᓪᓗᐃᖃᑦᑕᑐᑦ ᐅᕝᕙᓗᓐᓃᑦ ᑳᖃᑦᑕᑐᑦ ᓂᕿᑦᓴᓯᐅᑎᑦᓴᖃᖕᖏᓂᑯᒥᓄᑦ)
• ᓄᓇᓕᒻᒥ ᓂᕿᑦᓴᓕᐅᕐᓂᖅ
ᓄᓇᓕᓕᒫᑎᒍᑦ ᓂᕿᖃᑦᓯᐊᕆᐊᖃᕐᓂᒧᑦ ᐱᖁᔭᓕᐅᕐᓂᒥ, ᓯᑕᒣᑦ ᑲᑎᒪᓂᐊᕈᓰᑦ ᓯᑕᒪᓂᑦ ᐱᒻᒪᕆᖁᑎᒋᔭᐅᔪᓂᑦ ᐱᓀᓗᑕᐅᔪᓂᑦ ᑲᑎᖕᖓᓂᐅᒐᔭᕐᑐᑦ ᐸᕐᓀᑕᐅᒪᕗᑦ 2017-2018ᒥ. ᓱᓇᐅᓂᖏᑦ ᐱᓀᓗᑕᐅᔪᑦ ᑕᑯᓐᓇᓱᒋᑦ, ᑲᑎᖕᖓᓃᑦ ᑲᑎᖕᖓᒋᐊᕐᑐᓯᒪᔪᖃᑐᐃᓐᓇᕆᐊᓖᑦ 30ᓂᑦ 80ᓄᑦ ᐃᓄᓐᓂᑦ ᓄᓇᖁᑎᓕᒫᖓᓂ ᐱᓯᒪᔪᓂᑦ ᐱᓇᓱᑦᑐᓂᑦ ᐅᕝᕙᓗᓐᓃᑦ ᐱᐅᓯᐅᒦᒋᐊᕋᓱᑦᑐᑦ ᓂᕿᖃᑦᓯᐊᕆᐊᖃᕐᓂᒥᒃ. ᑐᕌᒐᒋᔭᐅᓪᓗᑐᕐᑐᑦ ᑲᑎᖕᖓᓂᕐᓂ ᓇᓗᓀᒃᓯᓗᑎᑦ ᐸᕐᓀᓯᓗᑎᓗ ᖃᓄᐃᓘᕈᑎᑦᓴᓂᑦ ᑲᔪᓯᑎᑕᐅᒋᐊᓕᓐᓂᑦ ᐱᐅᓯᐅᒦᒋᐊᓂᐊᕐᑐᓂᑦ ᓂᕿᖃᑦᓯᐊᕆᐊᖃᕐᓂᒥᒃ ᓄᓇᕕᒻᒥ.
ᓯᕗᓪᓕᐹᒥ ᑲᑎᖕᖓᓂᖃᕐᓂᖁᑦ ᐅᑭᐊᖓᓂ 2017. ᐅᖄᒍᑕᐅᓐᓂᖁᑦ ᖃᓄᖅ ᓂᕿᑐᐃᓐᓇᑖᕈᓐᓇᒐᔭᕐᓂᖏᓐᓂᑦ. ᑐᑭᓯᒋᐊᕈᒪᒍᕕᑦ ᐊᓪᓚᑕᐅᓯᒪᒍᑎᖏᓐᓂᑦ, ᐅᓇ ᓃᓂᕈᒃ. ᐱᖓᓱᒋᐊᓪᓚᓂᑦ ᑲᑎᒪᓂᐊᕈᓯᖃᕐᑎᓯᓛᕐᒥᔪᑦ 2018ᒥ.
ᑐᑭᓯᒋᐊᕈᒪᒍᕕᑦ ᐃᓚᐅᒍᒪᒍᕕᓗᓐᓃᑦ ᑲᑎᒪᓂᐊᕈᓯᕐᓄᑦ: foodsecurity.nrbhss@ssss.gouv.qc.ca ᐅᕝᕙᓗᓐᓃᑦ 819-964-2222, ᓃᓂᕐᓗᒍ 353.
ᐅᑦᑐᕋᐅᑎᒃ ᓲᖑᓯᓕᐅᒥᑎᑦᓯᒋᐊᕐᓂᒧᑦ ᐱᓇᓱᐊᖃᑕᐅᔪᓂᒃ ᐊᓯᖏᓐᓂ ᓄᓇᓕᖃᕐᕕᐅᒥᔪᕐᓂ:
ᓄᓇᕘᕐᒥ ᓂᕿᖃᑦᓯᐊᑎᑦᓯᒐᓱᐊᕐᓂᒧᑦ ᑲᑐᑦᔨᖃᑎᒌᓐᓂᖏᑦ ᐸᕐᓇᓯᒪᐅᑎᖏᓐᓄᓗ: http://www.nunavutfoodsecurity.ca/iu