ᑖᒃᑯᐊ ᐱᓇᓱᑦᑏᑦ ᓴᐳᒻᒥᓂᖃᓲᖑᕗᑦ ᐃᓄᓕᒫᑦ ᐋᓐᓂᐊᓂᓕᕆᔭᐅᓂᖏᑦᑕ ᑐᑭᒧᐊᑦᑎᓯᔨᒻᒪᕆᖓᓂᒃ ᐱᓇᓱᐊᒐᖃᕐᑎᓗᒍ ᐋᓐᓂᐊᑖᕐᑎᓯᑦᑌᓕᓂᕐᒥᒃ, ᖃᓄᐃᖏᓯᐊᕐᓂᒥᓪᓗ ᑫᓪᓗᑐᐃᓂᕐᒥᒃ, ᐃᓄᓕᒫᓂᒃ ᑐᑭᓯᒪᑎᑦᓯᓂᕐᒥᒃ, ᐃᑉᐱᒋᔭᖃᕐᓂᒥᓪᓗ ᐃᓄᐃᑦ ᖃᓄᐃᖏᓯᐊᕐᓂᑯᑦ ᖃᓄᐃᓕᖓᓕᕐᓂᖏᓐᓂᒃ ᐊᒻᒪᓗ ᑕᒪᑦᓱᒧᖓ ᓇᓗᓀᔭᕐᑕᐅᒍᑎᖏᓐᓂᒃ, ᐊᒻᒪᓗ ᐱᓗᐊᕐᑐᒥᒃ ᖃᓄᐃᖏᓯᐊᕐᓂᑎᒍᑦ ᓴᐳᑦᔨᓯᒪᓂᕐᒥᒃ. ᖃᓄᐃᖏᓯᐊᕐᓂᒧᑦ ᑲᑉᐱᐊᓇᕐᓯᒍᓐᓇᑐᐃᑦ ᓄᐃᒍᓐᓇᒪᑕ ᐊᕙᑎᐅᔪᖅ ᓱᒃᑯᓇᕐᑐᑖᕐᑎᑕᐅᑐᐊᕐᐸᑦ (ᐃᒪᒃᑯᑦ, ᐊᓂᕐᓂᑯᑦ, ᓄᓇᒃᑯᑦ), ᓴᓇᔭᐅᒪᔪᐃᓪᓗ ᐱᓂᕐᓗᓂᑯᖏᓐᓄᑦ ᐅᕝᕙᓘᓐᓃᑦ ᐱᓗᑲᓐᓂᑯᑦ ᑲᑉᐱᐊᓵᕆᓂᒃᑯᓘᓐᓃᑦ ᐱᓂᐊᕐᓂᓄᑦ.
ᑖᒃᑯᐊ ᐱᓇᓱᑦᑏᑦ ᖃᓄᐃᓕᒍᑎᖃᓲᖑᒻᒪᑕ ᑐᓴᕐᑎᓯᒍᑎᒋᔭᐅᔪᓄᑦ ᑕᒪᒃᑯᓄᖓ ᐊᑦᔨᒋᖏᑐᓄᑦ ᑲᒪᒋᐊᑦᓴᐅᑎᒋᓲᓄᑦ ᐋᓐᓂᐊᓂᓕᕆᓂᒃᑯᑦ, ᑕᒪᒃᑯᓇᖕᖓᓗ ᑎᒥᐅᔪᕐᓂᑦ ᑲᕙᒪᒃᑯᓂᓪᓘᓃᑦ ᐅᑦᑑᑎᒋᓗᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ ᐊᒻᒪᓗ ᑲᑎᕕᒃ ᐃᓕᓐᓂᐊᓂᓕᕆᕕᖓᓂᑦ, ᑲᕙᒫᐱᒃᑯᓂᑦ ᐊᒻᒪᓗ ᐃᓄᓕᒫᓂᑦ ᐱᑦᔪᑎᒋᔭᐅᔪᖃᓕᑐᐊᕐᒪᑦ ᐊᕙᑎᒥ ᐊᑦᑕᓇᕐᑐᖃᑐᐃᓐᓇᕆᐊᖃᕐᓂᖓᓄᑦ. ᑖᒃᑯᐊ ᑌᒪᖓᓕᒫᖅ ᐱᓇᓱᑦᑏᑦ ᐊᑐᐃᓐᓇᐅᒪᑎᑕᐅᓲᑦ (24/7) ᑲᒪᒋᐊᑦᓴᐅᑎᒋᒋᐊᖃᓲᖑᒐᒥᒃ ᑌᒪᖓᓕᒫᑦᓯᐊᖅ ᐅᐃᒪᓇᕐᑐᓂᒃ ᐊᕙᑎᒨᓕᖓᔪᓂᒃ. ᑭᖕᖒᒪᓇᓕᑐᐊᕋᒥᒃ ᓱᒃᑯᓇᑐᐃᓐᓇᕆᐊᓕᓐᓂᒃ ᑭᓪᓕᓯᓂᐊᓯᓲᑦ ᐊᒻᒪᓗ ᖃᐅᔨᑎᑦᓯᒍᑎᖃᕐᓱᑎᒃ ᖃᓄᐃᖏᓯᐊᕐᓂᒧᑦ ᖃᓄᐃᓕᒋᐊᖁᔨᒍᑎᓂᒃ ᒪᑯᓄᖓ ᓱᒃᑯᓇᕐᑐᖃᓕᑐᐊᕐᒪᑦ ᐃᓪᓘᑉ ᐃᓗᐊᓂᓗ ᓯᓚᑖᓂᓗ ᐊᓂᕐᓂᖓᓂᒃ, ᐃᒪᑦᓯᐊᒨᓕᖓᔪᓂᓪᓗ, ᐳᐃᔾᔪᕋᕐᕖᓗ ᐃᒪᖏᓐᓅᓕᖓᔪᓂᒃ ᐊᒻᒪᓗ ᓂᕿᑐᐃᓐᓇᓅᓕᖓᔪᓂᒃ, ᐊᒻᒪᓗᑦᑕᐅᖅ ᐃᒪᕐᓗᑫᑦ ᖃᓄᐃᓕᖓᓕᕐᓂᖏᓐᓄᑦ, ᐱᓇᓱᐊᕐᕕᒪᕆᓪᓗ ᓴᓗᒣᓪᓕᑎᕆᓂᖏᓐᓄᑦ, ᐊᑐᕐᑕᐅᒍᒣᕐᑐᐃᑦ ᑲᒪᒋᔭᐅᓂᖏᓐᓄᓗ ᐊᒻᒪᓗ ᐊᓯᖏᓐᓄᑦ.