- ᓱᓇᒋᓐᓈ ᑲᒪᒋᔭᖃᕐᓂᖅ?
- ᑲᒪᔩᑦ ᐃᑲᔪᕐᓯᔭᐅᓂᖏᑦ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐱᓇᓱᑦᑎᖏᓐᓄᑦ
- ᑲᒪᔨᒋᔭᐅᔪᑦ ᓇᑯᕆᔭᐅᓂᖏᓐᓄᑦ ᑕᕐᕿᖃᕐᑎᑕᐅᒍᑎᒋᓲᖓᓂᒃ ᖃᐅᔨᑎᑦᓯᓕᐅᒥᒐᓱᐊᕐᓂᒧᑦ
- ᑐᕃᓐᓇᑐᒥᒃ ᑮᓇᐅᔭᖃᕐᑎᓯᓂᖅ ᑲᒪᔨᓂᒃ
ᓱᓇᒋᓐᓈ ᑲᒪᒋᔭᖃᕐᓂᖅ?
ᑲᒪᒋᔭᖃᕐᓂᖅ ᑐᓂᓯᓂᐅᕗᖅ ᐃᑲᔪᕐᓯᓂᕐᒥᒃ ᐃᓄᓐᓄᑦ ᐊᑦᓱᕉᑎᖃᕐᑐᓄᑦ ᖃᐅᑕᒫᕐᓯᐅᑎᓂᒃ ᐱᑦᔪᑎᖃᕐᓱᑎᑦ ᑎᒥᒥᓂᒃ ᐅᕝᕙᓗᓘᓐᓃᑦ ᐃᓱᒪᒥᒍᑦ ᐊᑦᓱᕉᑎᖃᕐᑐᓂᒃ. ᑕᒪᓐᓇ ᐃᑲᔪᕐᓯᓂᖅ ᑲᔪᓯᔪᒥᒃ ᕈᓐᓇᕕᓕᒃ ᐅᕝᕙᓘᓐᓃᑦ ᐃᑲᔪᓯᓂᖃᑲᓪᓛᓂᒃᑯᑦ, ᐊᑦᔨᒌᖕᖏᓱᑎᑦ ᓇᒻᒥᓂᖅ ᑲᒪᒋᔭᖃᕐᓂᑯᑦ ᑕᑯᔭᑦᓴᐅᓂᕐᒥᒃ ᐃᑲᔪᕐᓯᓂᒃᑯᑦ ᐃᓚᓐᓈᕆᔭᐅᒋᐊᕐᑐᓂᕐᒥᓗ.
ᓄᓇᕕᒻᒥ, 350-ᒦᒐᓛᑦᑐᑦ ᑲᒪᔨᒋᔭᐅᔪᑦ ᐱᒻᒪᕆᐅᕗᑦ ᐃᑲᔪᕐᓯᓂᕐᒥᒃ ᐃᓄᑐᖃᕐᓂᒃ ᐊᓯᖏᓐᓂᓗ ᐊᓂᕐᕋᓯᒪᑎᑦᓯᓯᐊᕐᓂᑯᑦ ᐊᑦᑕᓀᑦᑐᒦᑦᑎᓯᓂᒃᑯᑦ ᐊᓂᕐᕋᕆᔭᖏᓐᓂᒃ. ᓵᖕᖓᓯᒐᓗᐊᕐᓱᑎᑦ ᐊᑦᓱᕈᕐᓇᑐᓂᒃ ᑮᓇᐅᔭᖃᑦᓯᐊᖃᑦᑕᖏᓐᓂᑯᓪᓗ, ᐊᔪᐃᓐᓇᓲᖑᒻᒪᑕ ᐱᕕᑦᓴᖃᕐᓂᒥᒍᑦ ᐆᒻᒪᕿᑦᑑᓂᕐᒥᒍᓪᓗ ᐃᑲᔪᕐᓯᒐᓱᐊᕐᓱᑎᑦ ᐊᑦᑕᓇᕐᑐᒦᑐᐃᓐᓇᕆᐊᓕᓐᓂᒃ ᓄᓇᕐᖃᑎᒋᔭᕐᒥᓂᒃ. ᐱᓇᓱᐊᕐᑕᐅᓚᕆᒋᐊᓕᓐᓂᒃ ᐱᓇᓱᓐᓂᕆᓲᖏᑦ ᐃᓕᑕᕐᓯᔭᐅᓯᒪᒋᐊᓖᑦ.
- ᐃᓚᒋᔭᐅᕗᑦ ᐃᓚᓐᓈᕆᔭᐅᑦᓱᑎᓪᓘᓃᑦ ᑲᒪᒋᔭᖃᓲᖑᑦᓱᑎᑦ ᑭᓇᑐᐃᓐᓇᒥᒃ ᐃᑲᔪᕐᑕᐅᔭᕆᐊᓕᒻᒥᒃ - ᐊᖓᔪᕐᖄᕆᔭᐅᔪᒥᒃ, ᐊᑖᑕᑦᓯᐊᕆᔭᐅᔪᒥᒃ ᐊᓈᓇᑦᓯᐊᕆᔭᐅᔪᒥᒃ, ᓯᓚᕐᖃᑎᒋᔭᐅᔪᒥᓪᓘᓃᑦ.
- ᐱᓇᓱᑦᑎ-ᑲᒪᔨᒋᔭᐅᔪᑦ ᑐᓂᓯᓲᑦ ᑲᒪᒋᔭᖃᕐᓂᒥᒃ ᐃᓚᒋᔭᐅᑎᓪᓗᒍ ᐱᓇᓱᒐᕐᒥᓄᑦ ᓄᓇᓕᐅᑉ ᑎᒥᖁᑎᖏᓐᓂᒃ, ᐃᓗᓯᓕᕆᕕᓐᓄᑦ, ᐅᕝᕙᓘᓐᓃᑦ ᑐᕃᓐᓇᑐᒥᒃ ᑲᒪᒋᔭᕐᒥᓄᑦ, ᓄᐃᑦᓯᓲᖑᑦᓱᑎᓪᓗ ᐱᒍᓐᓇᓂᕆᔭᐅᓪᓚᕆᒋᐊᓕᓐᓂᒃ ᐊᒻᒪᓗ ᐃᓕᕐᖁᓯᕐᑎᒍᑦ ᖃᐅᔨᒪᔭᐅᔪᓂᒃ.
ᑲᒪᔩᑦ ᐃᑲᔪᕐᓯᔭᐅᓂᖏᑦ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐱᓇᓱᑦᑎᖏᓐᓄᑦ
NRBHSS-ᑯᑦ ᐸᕐᓇᓂᕐᒧᑦ ᐱᓇᓱᐊᒐᑦᓴᓕᕆᓂᕐᒧᓗ ᐱᒍᑦᔨᕕᖓ ᑐᓂᓯᓲᑦ ᑲᒪᔨᓂᒃ ᑲᔪᓯᔪᒥᒃ ᐱᒋᐅᕐᓭᖃᑦᑕᓂᒃᑯᑦ, ᑕᙯᕐᓯᑫᓐᓇᓂᒃᑯᑦ ᐱᒍᑦᔨᓂᕐᒥᒃ, ᑮᓇᐅᔭᕐᑎᒍᑦ ᐃᑲᔪᕐᓯᓂᕐᒥᒃ, ᐃᑉᐱᓂᐊᕐᓂᖏᒍᓪᓗ ᐃᑲᔪᕐᓯᓂᕐᒥᒃ.
ᒫᓐᓇᐅᑎᓪᓗᒍ ᐱᕙᓪᓕᐊᓂᖃᕐᑐᒍᑦ 2024-2026 ᐊᕐᕌᒍᖏᓐᓂᒃ ᓄᓇᓕᓕᒫᓄᑦ ᐊᐅᓚᑦᔦᒋᐊᕐᓂᒧᑦ ᐸᕐᓇᓯᒪᐅᑎᒥᒃ ᐃᑲᔪᖃᑎᒌᑦᓱᑕ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓗ ᐃᓄᑐᖃᕐᓂᒃ ᑲᒪᔨᒋᔭᐅᓲᓪᓗ ᑐᕌᕐᕕᓴᖏᓐᓂᒃ, ᐱᒋᐊᕐᑎᑕᐅᓛᕐᓂᐊᑐᖅ ᐊᕐᕌᒍᖓᓂᒃ 2026. ᑖᓐᓇ ᐱᒋᐊᕐᑎᓯᒍᑎᒃ ᑐᓂᓯᓛᕐᑐᖅ ᐱᕕᑦᓴᖃᕈᑎᓂᒃ ᑕᓯᐅᕐᓯᒍᑎᑦᓴᓂᓪᓗ, ᐃᓚᐅᑎᓪᓗᒍ ᐊᕐᕌᒍᑕᒫᑦ ᑲᒪᔨᒋᔭᐅᔪᑦ ᓇᑯᕆᔭᐅᓂᖏᓐᓄᑦ ᑕᕐᕿᖃᕐᑎᑕᐅᒍᑎᒋᓲᖓᓂᒃ ᖃᐅᔨᑎᑦᓯᓕᐅᒥᒐᓱᐊᕐᓂᒧᑦ.
ᑲᒪᔨᒋᔭᐅᔪᑦ ᓇᑯᕆᔭᐅᓂᖏᓐᓄᑦ ᑕᕐᕿᖃᕐᑎᑕᐅᒍᑎᒋᓲᖓᓂᒃ ᖃᐅᔨᑎᑦᓯᓕᐅᒥᒐᓱᐊᕐᓂᒧᑦ
ᓅᕕᒻᐱᕆᐅᒋᐊᑕᒫᑦ, NRBHSS-ᑯᑦ ᐊᓕᐊᓱᒍᑎᖃᓲᑦ ᑲᒪᔨᓂᒃ ᓄᓇᕕᒻᒥᐅᓂᒃ ᐊᕐᖁᑎᖃᕐᓱᑎᑦ ᑐᓴᐅᑎᓂᒃ ᐅᖃᐅᓯᑦᓴᖃᕐᓂᑯᑦ ᑕᕐᕋᒥᐅᒃᑯᑎᒍᑦ, ᓄᓇᓕᒻᒥ ᑐᓴᐅᒪᑎᑦᓯᒍᑎᖏᒍᑦ - ᐃᓚᒋᔭᐅᑎᓪᓗᒋᑦ ᖃᐅᔨᑎᑦᓯᓕᐅᒥᓂᕐᒧᑦ ᐊᓪᓚᓯᒪᔪᓚᑳᑦ ᑐᓂᐅᕐᖃᑕᐅᓲᑦ ᓄᓇᓕᓕᒫᓄᑦ - ᐊᒻᒪᓗ ᐅᓪᓗᕆᐊᖅ ᑲᒪᔩᑦ ᐱᒋᐊᕐᑎᑕᐅᒍᑎᕕᓂᖓᒍᑦ. ᓄᓇᕕᒻᒥᐅᑦ ᓈᒥᓃᑎᒍᓐᓇᑐᑦ ᑕᒪᒋᓐᓂᒃ ᑲᒪᔨᑐᐃᓐᓇᓂᒃ ᐊᒻᒪᓗ ᐱᔪᓐᓇᐅᑎᓕᓐᓂᒃ ᑲᒪᔨᓂᒃ ᖃᕆᑕᐅᔭᕐᑎᒍᑦ, ᐊᓪᓚᕕᑦᓴᑯᑦ, ᐅᕝᕙᓘᓐᓃᑦ ᑐᓴᐅᑎᒃᑰᕈᑎᐅᓗᑎᑦ ᑐᓴᐅᑎᒃᑰᕈᑕᐅᓕᕐᐸᑕ.
ᑕᕐᕿᐅᑉ ᓄᖕᖑᐊᓂ, ᐊᒧᒋᐊᕐᑎᖃᓲᑦ ᐅᐱᒍᓲᑦᔨᔪᓂᒃ ᑎᒃᑯᐊᑕᐅᓯᒪᔪᕕᓂᕐᓂᒃ ᑲᒪᔨᐅᓲᓂᒃ ᓄᓇᓕᒻᒥᓂᒃ ᓄᓇᓕᓕᒫᑎᒍᓪᓗ ᐊᓕᐊᓇᕐᑐᕋᑕᕐᓂᒃ ᐁᑦᑑᓯᐊᕆᓂᒃᑯᑦ, ᐃᓚᐅᑎᓪᓗᒋᑦ ᑯᐊᐸᒃᑯᓂᒃ ᓂᐅᕕᕐᓂᐊᕈᑎᓂᒃ ᐊᒻᒪᓗ ᐁᑦᑑᓯᐊᒻᒪᕆᒻᒥᒃ ᒪᕐᕉᓂᒃ ᖃᖓᑦᑕᐅᑏᓐᓂᒃ ᐃᓄᐃᑦ ᖃᖓᑦᑕᔫᖏᒍᑦ.
2025 ᖃᐅᔨᔭᐅᑎᑦᓯᓕᐅᒥᓂᕐᒧᑦ ᐃᓗᓕᖏᑦ ᐅᑯᐊᖑᔪᑦ:
ᑕᒃᑲᓂ ᐊᕐᕌᒍᕐᒥᑦ
- ᐅᓪᓗᕆᐊᖅ ᑲᒪᔨᓄᑦ ᐱᒋᐊᕐᑎᓯᒍᑎᒃ
- ᑐᓴᐅᑎᒃᑯᑦ (FM) ᓈᒪᓃᑎᕐᑎᓯᓂᖅ ᐅᓪᓗᕆᐊᖅ ᑲᒪᔨᖏᓐᓂᒃ
- ᖃᐅᔨᒪᔭᐅᑎᑦᓯᓕᐅᒥᓂᕐᒧᑦ ᐱᓇᓲᑎᖏᑦ ᐊᐅᓪᓚᑎᑕᐅᔪᑦ ᐋᓐᓂᐊᕕᓐᓄᑦ
- ᑕᕐᕋᒥᐅᒃᑯᑎᒍᑦ (TNI) ᑐᓴᐅᑎᒃᑯᑦ ᖃᐅᔨᔭᐅᓕᐅᒥᑎᑦᓯᓂᖅ
- ᑐᓴᕋᑦᓴᑕᓕᒃ Facebook-ᑯᑦ ᖃᐅᔨᔭᐅᓕᐅᒥᑎᑦᓯᓂᖅ
ᐅᓪᓗᕆᐊᖅ ᑲᒪᔨᓄᑦ ᐱᒋᐊᕐᑎᓯᒍᑎᒃ
- ᓈᒪᓃᑎᕐᓃᑦ ᐅᒃᑯᐃᑕᐅᓲᑦ ᓅᕕᒻᐱᕆ 1 ᐱᒋᐊᕐᓱᒍ 30-ᒧᑦ ᑎᑭᑦᓱᒍ.
- ᐊᐅᓪᓚᑎᑦᓯᒍᓐᓇᑐᑎᑦ ᓈᒪᓃᑎᕐᑕᐅᓯᒪᔪᓂᒃ ᖃᕆᑕᐅᔭᒃᑯᑦ ᐃᓚᐅᑎᓪᓗᒋᑦ Microsoft Forms
- ᐅᕝᕙᓘᓐᓃᑦ ᓯᑯᑦᓴᔭᒥᒃ ᑕᑕᕐᓴᒐᕐᑖᓗᑎᑦ ᓄᓇᓕᑦᓯ ᐋᓐᓂᐊᕕᖓᓂᒃ.
ᑐᕃᓐᓇᑐᒥᒃ ᑮᓇᐅᔭᖃᕐᑎᓯᓂᖅ ᑲᒪᔨᓂᒃ
ᑐᕃᓐᓇᑐᒥᒃ ᑮᓇᐅᔭᖃᕐᑎᓯᓂᖅ ᑲᒪᔨᓂᒃ ᐱᕕᑦᓴᖃᕐᑎᓯᓲᖅ ᐃᓄᓐᓂᒃ ᓄᓇᕕᒻᒥ ᐱᓇᓱᑦᑎᑖᕐᓂᑯᑦ ᓇᒻᒥᓂᖅ ᑲᒪᔨᓂᒃ ᐱᓇᓱᑦᑎᑖᕐᓂᒥᒃ ᑐᓂᓯᒐᔭᕐᑐᓂᒃ ᑲᒪᔨᒋᔭᐅᓂᕐᒥᒃ ᐊᓂᕐᕋᕆᔭᐅᔪᓂᒃ. ᑕᒃᑲᓂ ᐱᓇᓱᐊᕐᑎᓯᒍᑎᒥᒃ, ᐃᓄᒃ ᑲᒪᒋᔭᐅᔪᖅ ᐃᓚᐅᔫᔪᕈᓲᖅ-ᐱᓇᓱᑦᑎᓯᔨᐅᓂᕐᒧᑦ.
ᑕᒪᓐᓇ ᑐᑭᓕᒃ ᓄᓇᕕᒻᒥᐅᑦ ᐃᓅᔪᑦ ᐱᕕᑦᓴᖃᑦᓯᐊᖏᓐᓂᑯᑦ ᑎᒃᑯᐊᓯᒍᓐᓇᓲᑦ ᑭᓇᑐᐃᓐᓇᒥᒃ ᐅᑉᐱᕆᑦᓯᐊᑕᒥᓂᒃ ᐃᑲᔪᕋᔭᕐᑐᒥᒃ ᐊᓂᕐᕋᒥᓂᒃ, ᐱᓇᓱᐊᕐᑎᓯᒍᑎᒃ ᐱᕕᑦᓴᖃᕐᑎᓯᓯᑦᐊᓲᖅ ᐱᓇᓱᑦᑎᓂᒃ ᓴᐳᑦᔭᐅᓂᕐᒥᒃ ᐊᒻᒪᓗ ᐊᑭᓕᕐᑐᑕᐅᑦᓯᐊᓂᕐᒥᒃ.
ᖃᓄᖅ ᐱᓇᓱᐊᕈᑕᐅᓲᖑᓂᖓ
1. ᑐᕐᖁᑐᐃᓂᖅ
- ᑕᑕᕐᓴᓗᒋᑦ ᑐᕐᖁᑐᐃᒍᑎᐅᑉ ᑕᑕᕐᓴᒐᖏᓐᓄᑦ ᑲᒪᔩᑦ ᐱᓇᓱᑦᑎᕆᔭᖏᑦ.
- ᐊᑐᐃᓐᓇᕈᐃᓗᑎᑦ ᐃᓗᓪᓕᑐᕐᓯᒪᖕᖏᑐᒥᒃ ᓯᐊᒃᑭᒥᒃ ᐊᑭᓕᕐᑕᐅᒍᑎᑎᑦ ᑐᕐᖁᑕᐅᖃᑦᑕᕋᔭᕐᒪᑕ ᑮᓇᐅᔭᒃᑯᕕᒋᔭᕐᓄᑦ.
2. ᐊᖏᖃᑎᒌᒍᑎᒃ
- ᐱᔭᕇᕐᓗᒍ ᐱᖓᓱᐃᓕᖓᔪᒃᑯᑦ ᐊᖏᖃᑎᒌᒍᑎᒃ ᐃᓚᐅᑎᓪᓗᒍ ᐃᓚᐅᔫᔪᖅ-ᐱᓇᓱᑦᑎᓯᔨ ᐊᒻᒪᓗ ᐋᓐᓂᐊᕕᒋᔭᖓ.
- ᑖᓐᓇ ᐊᖏᖃᑎᒌᒍᑎᒃ ᓇᓗᓀᕐᓯᔪᖅ ᐱᓇᓱᐊᒐᑦᓴᑎᓐᓂᒃ ᐊᒻᒪᓗ ᐅᖓᑖᓅᖕᖏᑑᒋᐊᓕᓐᓂᒃ ᑫᕙᓪᓚᒍᓯᕐᓂᒃ ᐱᕕᑦᓴᖃᕐᑎᑕᐅᔪᓂᒃ ᒪᕐᕉᒃ ᐱᓇᓱᐊᕈᓯᑕᒫᑦ.
3. ᐃᓕᕙᓪᓕᐊᓂᖅ
- ᐋᓐᓂᐊᓯᐅᕐᑎ ᐃᓄᓕᕆᔨᓪᓘᓃᑦ ᐋᕐᕿᓱᐃᒐᔭᕐᑐᖅ ᑲᑎᓯᓂᑦᓴᒥᒃ ᐊᓂᕐᕋᕆᔭᖓᓂᒃ ᐃᓚᐅᔫᔪᖅ-ᐱᓇᓱᑦᑎᓯᔪᒥᒃ.
- ᑕᒪᓐᓇ ᐱᕕᑦᓴᖃᕈᑕᐅᔪᖅ ᐊᐱᕐᓱᑲᑦᑕᕈᓐᓇᓂᕐᒥᒃ ᐊᒻᒪᓗ ᐃᑲᔪᕐᓯᔭᐅᒍᓐᓇᓂᕐᒥᒃ ᐱᔭᕇᕐᓂᒧᑦ ᓯᑯᑦᓴᔭᓕᕆᔭᐅᒍᑎᖏᓐᓂᒃ.
4. ᐱᒋᐊᕐᓗᒍ ᐱᓇᓱᐊᕐᓂᖅ
- ᐊᓪᓚᖃᑦᑕᓗᒋᑦ ᑫᕙᓪᓚᒍᓯᑎᑦ ᐱᓇᓱᐊᕆᐊᓕᑎᓪᓗ ᑫᕙᓪᓚᒍᓯᓕᐅᕈᑎᒥᒃ ᐊᓪᓚᕕᑦᓴᒥᒃ ᐱᓇᓱᐊᕇᑕᒫᑦ.
- ᐊᐱᕆᓗᒍ ᐃᓚᐅᔫᔪᖅ-ᐱᓇᓱᑦᑎᓯᔪᖅ ᑕᕐᓴᖏᓐᓂᒃ ᐊᑎᒥᑕ ᐊᓪᓚᖁᓗᒍ ᑫᕙᓪᓚᒍᓯᓕᐅᕐᕕᒋᔭᕐᓂᒃ ᐱᓇᓱᒌᒋᐊᑕᒫᑦ.
5. ᑐᓂᓗᒋᑦ ᑫᕙᓪᓗᒍᓯᓕᐊᕕᓂᑎᑦ
- ᐱᓇᓱᐊᕈᓰᒃ ᒪᕐᕉᒃ ᓈᒋᐊᑕᒫᑦ, ᓭᓂᖃᑎᒋᓗᒍ ᑫᕙᓪᓚᒍᓯᓕᐊᕕᓂᑎᓐᓂᒃ ᐃᓚᐅᔫᔪᖅ-ᐱᓇᓱᑦᑎᓯᔪᖅ.
- ᑐᓂᒋᐊᕐᑐᓗᒍ ᐃᓄᒻᒧᑦ ᓇᒧᑐᐃᓐᓇᓘᓐᓃᑦ ᐊᖏᖃᑎᒌᒍᑕᐅᓯᒪᔪᒧᑦ.
- ᐱᒋᐊᕐᓗᒍ ᓄᑖᖅ ᑫᕙᓪᓗᒍᓯᓕᐅᕈᑎᒃ ᐱᓇᓱᓯᒻᒥᒍᕕᑦ.
6. ᐊᑭᓕᕐᑕᐅᓗᑎᑦ
- ᐱᒐᔭᕐᑕᑎᑦ ᐊᑭᓕᕐᑕᐅᒍᑎᑎᑦ ᑐᕃᓐᓇᑐᒥᒃ ᑮᓇᐅᔭᒃᑯᕕᒋᔭᕐᓄᑦ.
- ᐊᑭᓕᕐᑕᐅᓲᑦ ᒪᕐᕉᒃ ᐱᓇᓱᐊᕈᓰᒃ ᓈᒋᐊᑕᒫᑦ (ᑕᑯᓗᒍ ᑐᓄᖓ ᑫᕙᓪᓚᒍᓯᓕᐅᕐᕕᐱᑦ ᐅᓪᓗᖁᑎᖏᑦ).
ᐱᓇᓱᒐᐅᑉ ᖃᓄᐃᓕᖓᐅᓯᖏᑦ
- ᐊᑭᓕᕐᑕᐅᒍᑏᑦ ᖃᓄᐃᓪᓗᐊᓂᖏᑦ: $30 ᑫᕙᓪᓚᒍᓯᑕᒫᑦ, ᐲᔭᕐᑕᐅᓂᖃᕐᓗᑎᑦ (ᑖᒃᓯᓂᒃ, ᐱᓇᓱᑦᑎᐅᓂᕐᒧᑦ ᐃᒻᒪᖃᐅᑎᓂᒃ, ᐊᓯᖏᓪᓗ.).
- ᑮᓇᐅᑦᔭᓵᓕᕆᕕᒃ: ᐊᐅᓚᑕᐅᓂᓕᒃ ᑏᓴᐅᕐᑏᓐ HR Solutions, (Desjardins HR Solutions), ᐃᑲᔪᕐᑕᐅᓱᑎᑦ ᐅᑯᓄᖓ NRBHSS (ᖃᐅᔨᒋᐊᕐᕕᒃ: direct.allowance.rr17@ssss.gouv.qc.ca).
- ᓯᕕᑐᓂᖏᑦ: ᐅᓪᓗᖏᑦ ᐋᕐᕿᓱᕐᑕᐅᓲᑦ ᑐᕃᓐᓇᑐᒃᑯᑦ ᐱᓇᓱᑦᑎᒧᑦ ᐃᓚᐅᔫᔪᖅ-ᐱᓇᓱᑦᑎᓯᔪᒧᓪᓗ.
- ᓴᐳᑦᔭᐅᓂᖅ: ᐱᓇᓱᑦᑏᑦ ᑲᒪᒋᔭᐅᒍᑎᖃᕈᓐᓇᑐᑦ ᐅᑯᓂᖓ CNESST ᐱᓇᓱᒐᕐᒥᓄᑦ-ᐃᓕᖓᔪᓄᑦ ᐱᓂᕐᓗᐊᕿᒍᑎᓂᒃ, ᐊᑭᓕᕐᑕᐅᑎᓪᓗᒋᑦ ᑐᕐᖃᑕᕐᕕᑯᖏᓐᓄᑦ ᐊᓐᓂᐊᓂᓕᕆᓂᕐᒧᑦ ᐃᓄᓪᕆᓂᕐᒧᓗ.
- ᐱᓇᓱᒐᐅᑉ ᖃᓄᐃᓕᖓᓂᖓ: ᐱᓇᓱᑦᑎᑕᐅᕗᑎᑦ ᐃᓚᐅᔫᔪᖅ-ᐱᓇᓱᑦᑎᓯᔪᒧᑦ, ᐋᓐᓂᐊᕕᒻᒨᖏᑦᑐᖅ.
ᐱᒻᒪᕇᑦ ᖃᐅᔨᒪᔭᐅᒋᐊᓖᑦ ᑲᒪᒋᔭᐅᓲᓄᑦ
- ᑐᓴᐅᒪᖃᑎᙯᓐᓇᓗᑎᑦ ᐊᒻᒪᓗ ᐱᕈᕐᑎᓗᒍ ᐱᐅᔪᑎᒍᑦ ᐱᓇᓱᓐᓂᑯᑦ ᐃᓚᐅᔫᔪᖅ-ᐱᓇᓱᑦᑎᓯᔪᖅ.
- ᐱᓇᓱᓲᖑᒍᕕᑦ ᒪᕐᕉᒃ ᐅᖓᑖᓅᕐᑑᓄᑦ ᐃᓚᐅᔫᔪᖅ-ᐱᓇᓱᑦᑎᓯᔪᓄᑦ, ᐃᓱᒪᒋᔭᑦᓴᐅᒥᔪᖅ ᐱᓇᓱᑦᑎᖑᕐᓂᖅ ᐋᓐᓂᐊᕕᒻᒧᑦ ᑐᕃᓐᓇᑐᒥᒃ ᑖᒃᓯᓕᕆᔭᐅᓂᖅ ᐱᑦᔪᑎᒋᓗᒍ ᓇᓗᓇᕐᓯᓲᖑᓂᖏᑦ.
- ᕿᒥᕐᕈᒋᐊᓪᓛᖃᑦᑕᓗᒋᑦ ᑫᕙᓪᓚᒍᓯᓕᐅᕈᑎᑎᑦ ᐃᑉᐱᒋᑦᓯᐊᓗᒋᑦ ᑐᑭᓯᒪᑦᓯᐊᓗᒋᓗ ᐊᑭᓕᕐᑕᐅᕕᑎᑦ ᐅᓪᓗᖏᑦ.